Hawaiimi akunnittarfiit annaassiniarnermi atorneqarnissaannut piareersarneqartut
Takornarniat Hawaiip qeqertaasa ilaannut Mauimukannginnissaat kaammattuutigineqarpoq, tamaanimi orpippassuit USA-p oqaluttuarisaanerani ikuallennerisa annerpaartaasa ilaat peqqammerpoq.
Mauimimi oqartussat tamaani akunnittarfiit annaassiniartartunut innuttaasunullu najukkamit qimagussorneqarsimasunut atorneqarnissaat piareersaleruttoraat, USA-mi nutaarsiassaqartitsiviit ilaat AP allappoq.
Inuit 90-init ikinnerunngitsut Mauimi orpippassuit ikuallanneranni ajunaarsimasut maannamut nassaarineqarput.
Takornarniat Hawaiip qeqertaanut allanut takornarniarnissaat taarsiullugu kaammattuutigineqarpoq.
Nunap 8,5 kvadratkilometerip ikuallassimanissaa naatsorsuutigineqartoq
Inuit 46.000-t - takornarniat innuttaasullu taakkununnga ilaallutik - Mauimit pingasunngormalli qimagussorneqartut, Mauimi takornarniartitsinermut oqartussat oqaatigaat.
Mauimi illoqarfik Lahaina eqqorneqarnerpaanut ilaavoq. Lahainap sanaqqinneqarnissaata 5,5 milliardit koruuninik, tassa 37,2 milliardit koruunit missaannik akeqarnissaa ilimagineqarpoq.
USA-mi ajunaarnersuaqartillugu aqutsisoqarfik FEMA taama naliliivoq, nunap 8,5 kvadratkilometerip ikuallassimanissaa naatsorsuutigineqarluni.