Bidenip schæferia præsidentip illorsuaniit qimagutitinneqartoq
Amerikap præsidentiata Joe Bidenip nuliatalu Jillip qimmiat schæfereq, Commander, kiisortuummat præsidentip illorsuaniit qimagutitinneqartariaqarsimavoq. Qimmimmi taassuma illorsuarmi tassani sulisut arlallit aammalu præsidentimut paarsisutut sulisut arlallit arlaleriarluni kiisarsimavai.
Amerikap præsidentiata nuliata oqaaseqartartua avammut taama nalunaarsimasoq, nutaarsiassanik siammarterivik ritzau allappoq.
- Præsidenti nulialu paarsisut pisunullu akuusut tamaasa aaqqiissuteqartoqarnissaata tungaanut tapersersuinerannut naammagittarnerannullu qujarusupput, præsidentip nuliata oqaaseqartartua oqarpoq.
Taassumattaaq erseqqissaatigaa, qimmeq taanna illorsuarmiit allamut maanna nuutsinneqareersimalermat.
- Commander præsidentip illorsuaanikkunnaareerpoq eqqaaniinnaniluunniit, taanna oqarpoq.
Præsidentip qimmia marlunnik ukioqarpoq, 2021-milu qimmit nuannarineqartut akornani ilisaritinneqarsimalluni.
