Bentiaraq Ottosen silap pissusiata allanngoriartornera pillugu: Allanngortoqarujussuartariaqarpoq

Sermersuaq aakkiartorpoq. Immap killinga qaffakkiartorpoq. Immap sikua aakkiartorpoq. Qeriuaannartoq aakkiartorpoq. Taamatuttaaq silap eqqoriaruminaannera, anorersuillu sakkortuut nalaappagut. 

Avatangiisinut naalakkersuisoq, Bentiaraq Ottosen Atassummeersoq, Copenhagen Climate Ministerialimut danskit illoqarfiisa pingaarnersaanni qaammatip aallartinnerani pisumi peqataanermini taama oqariartuuteqarpoq. 

Tassani ministerit pisortallu, silap pissusia pillugu ataatsimeersuarnissamut – COP30-mut – Brasiliami novembarimi pisussamut piareersarnerannut atatillugu ulluni marlunni ataatsimiipput.

Bentiaraq Ottosen, qaammat kingulleq avatangiisinut naalakkersuisunngortoq angusaqarniarnissaminut piareersimavoq. 

- Nunap inoqqaavi eqqartorneqartillugit Nunap inoqqaavi silap pissusiata allanngoriartornerani eqqugaammata taakku atugarissaarnerulernissaat pillugu aningaasaliinerusoqartariaqartoq oqaatigaarput, taanna oqarpoq.

Qaqqat sisoornerat pinngortitamilu ajunaarnersuit 

Nunatsinnilu silap pissusia pillugu ilungersunartut nalaatagut amerlapput.

- Silap pissusiata allanngoriartornerata malitsigisaanik aningaasaqarnerput annikilliartuinnarpoq. Taamatuttaaq qaqqat sisoornissaannut pinngortitamilu ajunaarnersuaqarnissaanut aarlerinartoqarneruvoq, Bentiaraq Ottosen oqarpoq.

Taamaakkaluartoq silap pissusia pillugu isumaqatiginninniarnerit arriippallaartut, taanna isumaqarpoq. Nunap inoqqaavi isumaqatiginninniarnerni initunerusariaqartut, taanna isumaqarpoq. 

- Allanngortoqarujussuartariaqarpoq, tusaaneqartariaqaraluarpugullu. COP30-mi tamanna oqariartuutaassasoq, Bentiaraq Ottosen oqarpoq. 

Nunatsinnilu aamma aallartittariaqarnerarpaatigut.Naalagaaffittut silap pissusia pillugu nammineerluta pilersaarusiortariaqartugut, naalakkersuisunngortoq isumaqarpoq.