Aningaasanik nutaanngitsunik nakkakaatitsivinniittuuteqarpit? Taava taarsissavatit
Nationalbankip siniffiup ataa aningaasanillu nakkaatitsivik qimerlooqquai. Tassami aningaasat pappilissat nutaanngitsut maajip 31-at 2025 nallertinnagu taarserneqassapput. Taassumami kingorna aningaasaajunnaarlutik pappiliaannanngussapput.
- Aningaasat pappilissat nutaanngitsut tamaasa, 1000 koruunillu pappilissat katersuleruttorpagut. Maajip aallaqqaataat ilanngullugu suli atorneqarsinnaapput. Taassuma kingorna pisiniarfinni atorsinnaajunnaassapput, aningaaserivinnilu taarserneqarsinnaajunnaassallutik, Nationalbankenimi aningaaserisuuneq, Niels Kaas oqarpoq.
Aningaasaq pappiliaq 1000 koruuni, aningaasallu pappilissat 2009-utinnagu atuutilernikut pineqarput. Aningaasat pappilissat atuukkunnaartussat ilanngutassiap ataatungaani takusinnaavatit.
Immikkut ittumik aaqqissuussineq
Taamaattorli Nationalbanken aningaasat pappilissat nutaanngitsut nungusarnissaannut ajornannginnerulersitserusulluni, Kalaallit Nunaanni immikkut ittumik atuuttussamik aaqqissuussivoq.
– Atuisut aningaasaatitik pappilissat 2026-mi maajip 31-ata tungaanut taarsertikkiartorsinnaassagaat Grønlandsbanken aamma Bankivik isumaqatigiissusioqatigaagut, Niels Kaas oqarpoq, erseqqissaallunilu:
– Taamaakkaluartoq aningaasanik toqqortaqaraanni maajip 31-at 2025 qaangiutsinnagu isumaginissaat innersuunnarpoq.
Aningaasat ukiup ataatsip ingerlanerani taarsertinneqarsinnaassapput, kisianni maaji naappat pisinarfinni atorsinnaajunnaassallutik.
Nationalbankenip suliffeqarfik aningaasanik taarsiisarfik Københavnimi, Odensemi Aarhusimilu immikkoortortalik Forest aamma isumaqatigiissusioqatigaat. Taakkunani 2026-mi maajip 31-ata tungaanut aningaasat atorunnaartussat aamma taarserneqarsinnaassapput.
Isumannaallisaaneq aningaasallu pappilissat nutaat
Kisianni sooruna aningaasat pappilissat taakku atorunnaarsinneqassasut?
Nationalbankenip oqarnera naapertorlugu tamanna arlalinnik peqquteqarpoq. Aningaasat pappilissat nutaanngitsut amerlasuut annikinnerusumik isumannaallisarneqarput, peqquserlullunilu allanngortinnissaannut ajornannginnerullutik. Taamatuttaaq aningaasanngorlugu akiliisartut ikimmata – pingaartumik 1000 koruuni pappilianngorlugu ulluinnarni atorneqarpiarneq ajorpoq.
Taamatuttaaq Nationalbanken aningaasanik pappilissanik nutaanik 2028-mi aamma 2029-mi atuutilersitsinissaminut atatillugu nutaanngitsunik nungusaavoq.
Aningaasani pappilissani nutaani atuutilertussani Arnarulunnguaq, H.C. Andersen aamma Tycho Brahe ilaatigut assitaliunneqassapput. Taakkunani imaq, ulluinnarni inuuneq, qallunaatullu ilusilersuineq sammisatut qitiussapput. Atuutilertussanilu nutaani isumannaallisaaneq qaffasinnerutinneqassaaq.
Aningaasat pappilissat sorliit atorunnaarsinneqassanersut uani paasisaqarnerusinnaavutit.
