Tusarfik: Rusland isumaqatigiinniarnerni Ukrainep nunataanik amerlanerusunik piumasaqartoqartoq

Ukraine nunap immikkoortuinit tamanit Ruslandip piumasaqaataanit tunuartariaqarpoq.

Ukrainemit tusarfiup oqarnera naapertorlugu Ukrainemi sakkuaakkunnaartoqassappat russit tamanna piumasaqaatigaat.

Nutaarsiassaqartitsivik Reuters arfininngornermi taama allaaserisaqarpoq.

Tusarfik, kinaassutsimik isertuusserusuttoq isumaqatigiinniarnerup imarisaanik ilisimasaqartutut nassuiaatigineqarpoq. Tusarfimmit paasissutissat pisortatigoortumik uppernarsarneqanngillat.

Rusland Ukrainelu Tyrkiami tallimanngornermi naapipput. Nunanit taakkunannga marlunnit sinniisit sorsunnermi tigusanik paarlaannissaq taamaallaat isumaqatigiissutigisinnaasimavaat.

Russit isumaqatigiinniarnerup ingerlaqqinnissaanut tunngavissiinngitsumik piumasaqaateqartut, ukrainemiup tusarfiup tallimanngornermi oqaatigaa. Allanik annikitsortalerlugu paasissutissiisoqanngilaq.

Sorsunnermi ajoqusernernut taarsiiffigineqarnissamik taamaatitsineq

Ukrainimiut aallartitaata russit eqqissisoqarnissaanut isumaqatigiissuteqarnissamut uku piumsaqaatigigaat oqaatigaa:

* Ukrainimiut sakkutuui nunap immikkoortuinit Donetskimit, Zaporizjzjamit, Khersonimit aamma Luhanskimit tunuavissasut. Aatsaat tamatuma kingorna sakkuaakkunnaarnissaq aallartinneqarsinnaavoq. Nunap immikkoortui taakku russit sakkutuuinit tamakkiisumik imaluunniit ilaannakortumit aqunneqarput, ukrainemiulli sakkutuui immikkoortut arlallit ilaanni suli sorsupput. Piumasaqaat amerikamiut isumaqatigiissuteqartoqarnissaanut siunnersuutaannut ilaanngilaq.

* Ukrainemi nunap immikkoortuisa tallimat – tassa Donetskip, Zaporizjzjap, Khersonip, Luhanskip aamma Krimip 2014-imi Ruslandimit tiguarneqartup russinut ilaasutut nunat tamalaat akornanni akuerineqarnissaat. USA-p Krim inatsisitigut akuerissagaa amerikamiut siunnersuutigaat. USA-p nunap immikkoortui sisamat russinit aqunneqartutut taamaallaat akueriniarpai inatsisitiguunngitsorlu.

* Ukraine kalluunnaveersaartunngortinneqassasoq, aserortererujussuarsinnaasumillu sakkoqassanngitsoq, Ukrainellu iligisai Ukrainep nunataanut sakkutuunik aallartitaqarsinnaassanngitsut. Piumasaqaat uku amerikamiut siunnersuutaanni ilaanngilaq.

* Aaqqiagiinnginnermi illuatungeriit tamarmik sorsunnermi ajoquserneqarsimasunut taarsiissuteqartoqarnissaanik taamaatitsissasut. Amerikamiut Ukrainemut taarsiissuteqartoqarnissaa siunnersuutigigaluarpaat.

Ukainemiup atorfillip oqarnera naapertorlugu russit isumaqatigiinniartuisa piumasaqaatit oqaatsitigut taamaallaat oqaatigaat. Piumasaqataatinut uppernarsaammik tunniussisoqanngilaq.

/ritzau/Reuters