Atassutip siulittaasua: Qinersisartut pisariaqartippaatigut
Knud Kristiansen Mala Høy Kukolu partiimut allamut qinigaaffimmi matumani nuummata Atassutip annaanikuuai. Partiili maanna qilanaarutissaqalerpoq.
Atassutip Inatsisartunik qinersinissamut sassartitaqarsinnaasutut akuerineqarnera ullumi sisamanngornermi nalunaarutigineqarpoq.
KNR-ip Siverth K. Heilmann oqaloqatigimmagu tupaallannanngitsumik nalerisimaarpoq.
- Nuanneqaaq. Atsiortitsisut atsiortorpassuillu, ilaatigut partiinut pioreersunut atsiorsimasut, tamaviisa qutsavigerujussuarpakka, partiip siulittaasua oqarpoq.
Taassuma oqaatigaa partii tapersersorneqaqisoq.
- Piffissap sivisunngitsup iluani, suli atsiorusuttorpassuaqaraluartoq, tassa naammasseriikatappugut. Tamatuma uppernarsaannarpaa Atassut suli pisariaqartinneqarlunilu tapersersuisorpassuaqartoq, Heilmann oqarpoq.
AAMMA ATUARUK Atassut klar til at stille op til valg
Partiinut allanut nuuttarneq unitsinniaraat
Politikerit malunnaatillit piffissap ingerlanerani Atassummiit anisarnikuupput -Knud Kristiansen Mala Høy Kukolu Siumumut qinigaaffimmilu matumani nuullutik.
Taamaattoqartarneralu pinngitsoorniarlugu Atassut sinnerlugu qinigassanngortittut partiimit anissagaluarunik Inatsisartunit tunuartarnissaat qulakkeerniarlugu sassannginnermi isumaqatigiissummik atsiortarnissaat Atassummi siulersuisut aalajangiussimavaat. Taamaaliornikkut partiimi sinniisut isertarnissaat qulakkeerniarpaat.
Atassut Inatsisartuni ilaasortaatitaqaqqilissagaluaruni siullertut sulissutiginiagaa tassaavoq; inatsisip, partiimiit partiimut allamut nuussinnaanermut, nuuttoqarneranilu partiimut qinikkamullu tapiissutaasartut partiimut nuuffimmut nuunneqartarneranik, periarfissiisup allanngortinneqarnissaa.
- Taanna qaangiuttariaqalerpoq, Siverth K Heilmann oqarpoq.
Politikerit malunnaatillik Atassummiit aninerisa kingorna Siverth K. Heilmann taartissaasinnaasunik nassaartariaqarpoq. Tamannalu nammineq Inatsisartunut qinersinissamut sassarnermigut inuusuttunillu sassartitaqarnermigut iluatsissinnaallugu qularinngilaa.
Siverth K Heilmann Qeqqata Kommuniani qinersinermi kingullermi 596-inik qinerneqarpoq.
AAMMA ATUARUK Mala Høy Kukop Atassut ilaasortaatitaarutikkaa