Barentip Imartaata nalaa takornariaqartitsinikkut siuariartorfiuvoq
Nunatta ukiuni makkunani anguniakkamisut sukataarutaa, tassa takornariaqartitsinerup siuarsarneqarnissaa, Barentip nalaani iluatsilluarsimavoq.
Aamma atuaruk Norgep avannaani Kalaallit Nunaata kissaataa piviusunngortinneqarpoq
Tamaani takornariaqartitsineq ukiup ingerlanerani sivikitsuinnaasarnikuugaluarpoq, suliffissaqartitsiniarnermut tamanna sunniuteqapilulluni. Norgep avannaani takornarniaqartitsinermik suliallit Nordnorges Reiselivip pisortaat Arne Trengereid taama oqarpoq:
- Takornarniat annerusumik aasakkut tikittaraluarput. Takornariaqartitsinermili isertitat amerliniarlugit ukioq naallugu takornariaqartitsisinnaanissarput pillugu ilungersuuteqarpugut, suliffissaqartitsiniarnikkut tamanna iluaqutaaniassammat. Takornarniat ukiuunerani tamaangarsinnaanissaat taamaammat sulissutigaarput, iluatsipparpullu, Arne Trengereid oqarpoq.
Unnuisartut amerleriarsimapput
Takornarniat tamaanga tikittartut 2010-mili amerliartuinnavissimapput. Takornarniat Norgep avannaani Finnmarkenimi 2013-imi 540.000-eriarlutik unnuisarsimapput, ukiut marluk ingerlaneranni 10 procentinik amerleriarlutik. Barentillu nalaani inuit 200.000-it missaat takornarnianik toqqaannartumik toqqaannanngikkaluartumilluunniit maanna sullissisuupput. Ukioq naallugu takornarniaqartitsisoqartarnera pissutaavoq.
Aamma atuaruk Akunnittarfinni unnuisoqarnerulersimavoq
Finlandimut takornarniat ukiuunerani amerlasaqaat, Norgellu tassanngaanniit siunnersortilerluni ukiukkut nammineq takornarniaqartitsinerusalersimavoq.
- Aap, nunani avannarlerni suleqatigiilluarnerulersimavugut, nunap immikkoortuata tamanna avammut nittarsaanniarneqarnerani suleqatigiillualersimalluta, Arne Trengereid oqarpoq.
Nunat akornanni angalasinnaaneq
Takornarniallu tamaangaraamik angalanerami ataatsimi nunat akornanni angalasinnaasarput, assersuutigalugu Norgep avannaani saattuarniaqataasinnaallutik, Finlandimilu saamit akornanni najugaqarsinnaallutik.
Aamma atuaruk Takornariartaassuarmik nunatsinnukartut ikinnerusut
- Naak takornarniat pillugit nunat unammilleqatigiikkaluartut, takornarniat assersuutigalugu nunat marluk akornanni angalasinnaanissaat suleqatigiissutigisarpaat, Trengereid erseqqissaavoq.
Barentip nalaani nunat akornanni timmisartuussisarnerit aamma aaqqissuussaanerulersimapput, billetsillu akikitsut, aalaakkaasullu takornarnianut neqeroorutigineqarsinnaalerput.
