Akunnittarfinni unnuisoqarnerulersimavoq

2009-mi akunnittarfinni init atorneqanngitsut 63,8 procentiusimasut, ukiut sisamat qaangiummata 2013-imi 59,2 procentimut apparsimapput.

Taama ineriartortoqarnerata Visit Greenlandip pisortaata Anders Stenbakkenip nuannaarutigaa. Taanna isumaqarpoq taama pisoqarneranut pissutaasoq Islandip Nunattalu akornanni timmisartuussisarneq;  tamannalu ingerlaannarumaartoq.

- Taama nuannersumik pisoqarnerata ingerlaannarnissaa neriuutigaarput, Anders Stenbakken KNR-imut oqarpoq.

Kisitsisit siuariarnissamik neriusaarigaluartut, Island suli angoqqajanngilaat, naak Nunatta taanna assersuutigissallugu nuannaringaluaqingaa. Taakkumi 2013-imi akunnittarfiini inissat 62,8 procentii atorneqarsimapput.

Anders Stenbakkenip isumaa malillugu tamanna Nunatsinnut aamma piviusunngussappat, takornariaqarnerpaasarfiata avataani takornariat aamma ussagartinneqartariaqarput.

- Sulissutigisariaqarparput takornariaqarnerpaaffigisartagaata sivitsorneqarnissaa, taamaalillunilu aamma akunnittarfiit atorluarneqarnerunissaat. Takornariat ikinnerpaaffianni atuarnerup nalaani, atuinerit ikittuararsuusarput. Anders Stenbakken aamma qanoq iliorsinnaasugut siunnersuutissaqarpoq:

- Taamaaliorsinnaavugut ukiukkut upernaakkullu aaqqissuussatta maannamiit ersarissarnerullugit nittarsaalluarnerisigut, kalaallit islandimiullu takornariartitsisut niuvernerpalaartumik suleqatigiisillugit ukiukkut, upernaakkut ukiakkullu takornariartitsinerit tuniniartarnerisigut, Anders Stenbakken KNR-imut oqarpoq.