BankNordikip ukiumut naatsorsuutit ilorrisimaarnartut saqqummiukkai
Akileraarutit sioqqullugit angusaq 260 millionit koruuniuvoq, angusat 2018-imut naleqqiullugit ikinnerulaarlutik, 2018-imi angusat akileraarutit sioqqullugit 323 millionit koruuniummata.
BankNordikip Kalaallit Nunaannni immikkoortortaata aningaaseriviup ataatsimut isigalugu angusarissaarneranut ilaavoq, nunatsinnilu suli annerusumik ineriartortitsinissamut periarfissaqartoq, BankNordikip aqutsisuisa tusagassiutinut nalunaarummi oqaatigaat:
- BankNordikip 2019-imi ingerlatsinera tamakkiisumik isigalugu ajunngitsumik ingerlavoq. Kalaallit Nunaanni taarsigassarsisitsinitta annertussusaa 33 procentimik qaffariarsimavoq, tassuunalu takusinnaavarput sullitat aningaaserinikkut eqeersimaartut, Árni Ellefsen, BankNordikimi pisortaaneq oqarpoq.
Suliffeqarfiit atorniartarnerannut saaffiginnittut qassiiusut
BankNordikip aningaasaateqarfik aningaasaliisartoq Den Europæiske Investeringsfond suleqatigilerpaa, suliffeqarfiillu nutaaliortut aningaaserivimmit iluatinnartunik taarsigassarsisinneqarsinnaalerlutik.
BankNordik, Kalaallit Nunaanni kisiartaalluni taama taarsigassarsisitsisinnaavoq. Suliffeqarfiit piujuartitsisunik nutaaliornertalinnillu suliniuteqarumallutik aningaasalersorneqarnissamik qinnuteqartut taamaammat arlaqarsimasut, BankNordikip oqaatigaa.
BankNordikip legatiata 100.000 koruuninik aningaasartallip, ilinniartunut kalaallinut sisamanut ukiumoortumik tunniunneqartup saniatigut legatimik nutaamik, 150.000 koruuninik aningaasartalimmik BankNordik aamma pilersitsivoq.
Ilinniartumut kalaallimut ataatsimut, Nordatlantisk Gymnasieklassemi ilinniartumut, taanna tunniunneqartassaaq. Legati ukiut pingasut ingerlaneranni tunniunneqartassaaq, ilinniarnermi ukiunik pingasunik sivisussuseqarmat.
- Nalunngilarput inuiaqatigiit ineriartortuassappata ilinniarnissaq pisariaqartoq, tamannalu aamma suliffeqarnikkut ingerlalluarniaraanni tunngavissaasoq. Inuusuttut ilinniagaqarnissaannut tapersersorumallugit legatinnatsitsisarpugut, taamaasillu talu inuiaqatigiinni qaffasinnerusumik ilinniagaqarsimasut amerliartornissaat suliniuteqarfigalugu, BankNordikip pisortaanera Árni Ellefsen oqarpoq.