BankNordik kalaallisut atertaassasoq

Føroya Bankip (Savalimmiut aningaaseriviat) Sparbankip nunatsinni immikkoortortaqarfii taakkunanilu suliat ilanngullugit 2010-mi pisiarimmagit, aningaaseriviup taassuma aqqi BankNordikinngortippaa.

Taamaniilli ukiut 14-it qaangiupput, Banknordikilu tassa atertaaqqinnialerpoq.

Aningaaseriviummi BankNordikip Danmarkimi immikkoortortaqarfeqarunnaarlunilu suliaqarunnaarnikuunini pissutigalugit aqqi ullutsinnut naleqqussoriunnaarpaa.

Taamaammat BankNordikip aqqi Føroya Bankinngorteqqippaa (Savalimmiut aningaaseriviat) – tassa BankNordik 1906-imi pilersinneqarami Føroya Bankimik atserneqarpoq.

Aningaaseriviullu taassuma nunatsinni immikkoortortaqarfini kalaallisut tassa atissarsiorlugu unammisitsileruttorpoq.

BankNordikip pisortaa Turið F. Arge taama oqarpoq.

- Aningaaserivitta aqqa Færøernes Bankinngorteqqipparput, Savalimmiuni suliaqarnitsinnut naleqqunnerusorigatsigu. Taamaammat Kalaallit Nunaanni immikkoortortaqarfipput asseqanngitsumik tulluarnerusumillu kalaallisut atissarsiorparput. Tassa nunani taakkunani marlunni immikkoortortaqarfivut atertaartinniarlugit aalajangerpugut, taanna oqarpoq.

Taamaammat Banknordik nunatsinni immikkoortortaqarfini kalaallisut atissarsiorlugu unammisitsivoq, kikkulluunniillu siunnersuuteqarsinnaapput.

- Kikkulluunniit siunnersuuteqarsinnaakutsoorput, tassa siunnersuuteqartut meeraanersut, inersimasuunersut atuisuunersulluunniit apeqqutaatinngilarput. Unammisitsinitsinnilu peqataasorpassuaqartoq takusinnaavarput. Maannamut siunnersuuteqartorpassuaqareerpoq.

Allagartarsuaq BankNordikimik allannillit aningaaseriviup taassuma Nuummi immikkoortortaqarfiata silataani takussaapput. Immikkoortortaqarfini taanna atissarsippagu allagartarsuit maanna takussaasut allanik taarsissapput. Assi © : Thor Bill / KNR

Unammisitsinerminnut siunnersuutit hunnorujulikkuutaat nassiunneqarsimalereertut sulili siunnersuuteqartoqarsinnaasoq, aningaaseriviup pisortaa oqarpoq.

Tulluartumik atertaartikkusukkaat

Atertaassaanilli toqqaaniarneq imaannanngilaq.

Aningaaseriviummi suliaanut naleqquttumik, allakkuminartumik taajuminartumillu atertaartikkusuppaat.

- Kikkuunitsinni taavalu atuisutsinnut inuiaqatigiinnullu akuuffigisatsinnut sullisseriaasitsinnik ersersitsisumik atertaartikkusupparput. Atertaassaanillu toqqaanissatsinnut piumasunik ikiortiserinninniarluta aalajangerpugut, Turið F. Arge oqarpoq.

Siunnersuuteqarnissamut immikkut piumasaqaateqarnatik, aningaaseriviup pisortaa oqarpoq.

- Siunnersuuteqartorpassuaqarnissaanut killiliisuussangatikkatsigu immikkut piumasaqaateqarniarnata aalajangerpugut.

Aningaaseriviup nunatsinni immikkoortortaqarfiata atertaassaanik siunnersuuteqarnissamut aggustip 25-at piffissaliussaavoq.

Atertaassaanik unammisitsinermi ajugaasumik toqqaasussat pingasuusut BankNordikimeersuunngillat, tassaasut Naja Paulsen, Pivinnguaq Mørch aamma Arina Kleist.