Bachelorit 33-it kanditatillu arfineq pingasut allagartartaarput
Ulloq malunnartillugu ilaquttat ikinngutit ilinniartitsisullu nalliuttorsiutinik atisaqarput, oqalugiartoqarpoq,
ilinniagaqarnermut uppernarsaatit allagartat tuniunneqarput, kiisalu bachelorimik kandidatimillu ilinnikkaminnik naammassisut qaffasinnerpaamik karaktereqartut akissarsitinneqarlutik.
27-nik ukiulik Eva Luusi Marcussen-Mølgaard inuiaat kulturiat oqaluttuarisaanerallu pillugit bacheloritut ilinniakkaminik naammassinnippoq Bachelorinngorniartunilu 33-usuni agguaqatigiissillugulu karakterit qaffasinnerpaamik 10,7-nik angusaqarpoq.
Eva Luusi Marcussen-Mølgaard ilisimatusarfimmi kandidatinngorniarluni ingerlaqqissaaq, taannalu pitinnagu nunanut allanut ilinniariaqqaasaaq. USA-mi naalagaaffimmi New Hamshiremi ilisimatusarfimmi Dartmouthimi qaammatini pingasuni ilinniasssaq.
54-nik ukiulik Heidi Rosing ilinniartuunermini immikkut ittumik suliniuteqarsimanera pillugu immikkut ittumik akissarsitinneqarpoq.
Heidi Rosing Oqaasilerinermik atuakkialerinermik tusagassiuutilerinermillu kandidatitut ilinniakkaminik naammassilluni tallimanngornermi allagartartaarpq, agguaaqatigiissillugulu karakterit qaffasinnerpaartaanik 10,2 -nik angusaqarpoq, sulisitsisullu peqatigiiffianit GE-mi akissarsitinneqarpoq, 5.000 kr-nik aningaasartalimmik.
Heidi Rosingip ukikkunnaarluni ilinniarneq, tunniusimaneq ilinniakkamillu nuannarisaqarneq angusarissaarnerminut pissutaanerarpaa.
- Inuusukkunnaarluni ilinniarneq aamma allaaneruvoq, tunniusimaneruneq meeqqanik isumagisassaqannginneq, sulereerluni misilittakkat - isumaqarpunga taakku peqqutit annersaattut isigaaka, soorunalimi aamma tunniusimaneq, ilinniarnermut tunniusimaneq aamma taanna pingaaruteqartorujussuuvoq, Heidi Rosing, Ilisimatusarfimmi Oqaasilerinermik atuakkialerinermik tusagassiuutilerinermillu kandidatitut ilinniakkaminik nammassilluni ullumi allagartartaartoq oqarpoq.
Bachelorinngortut immikkoortortani assigiinngitsuni ima amerlassuseqarput:
- Tusagassiornermut Immikkoortortaq: 1
- Inuiaqatigiit Kulturiannut Oqaluttuarisaanerannullu Immikkoortortaq: 10
- Nutserinermut Oqaluttaanermullu Immikkoortortaq: 6
- Inuiaqatigiilerinermut Immikkoortortaq: 4
- Isumaginninnermut Immikkoortortaq: 10
- Oqaatsinut, Atuakkialerinermut Tusagassiuutilerinermullu Immikkoortortaq: 2
Kandidatinngortut immikkoortortani assigiinngitsuni ima amerlassuseqarput:
- Inuiaqatigiit Kulturiannut Oqaluttuarisaanerannullu immikkoortortaq: 2
- Inuiaqatigiilerinermut Immikkoortortaq: 2
- Oqaatsinut, Atuakkialerinermut Tusagassiuutilerinermullu Immikkoortortaq: 4
