Meeqqat qarasaasiatigut attaveqatigiittarfinni nikassaannaveersaarneq ilinniartariaqaraat
- Atortut digitaliusut meerarpassuit inuusuttullu ulluinnaanni ajunngitsuullutillu nalinginnaasuupput, kammalaatigisalli narrunarsaannginnissaasa qulakkeernissaata arajutsinnginnaa pingaartorujussuuvoq. Danmarkimi assinik 1000-init amerlanerusunik unioqqutitsisumik siaruarterisimasutut pasineqartut suliarineqarput, taamaammat tamanna pinaveersaartinniarlugu suliniuteqangaatsiartariaqarpugut, Pisiu-mi siulittaasoq, politimesteri, Bjørn Tegner Bay oqarpoq.
Illoqarfinni nunaqarfinnilu meeqqat atortorissaarutit digitaliusut atorlugit pimmatigineqarneq nalaattarpaat, pingaartumik niviarsiaqqat akornanni. Tamanna HBSC-ip 2014-imi misissuinerata takutippaa inerniliutigalugulu nukappiaqqat 14 %-iisa nuanninngitsumik allagarsisimasut, taamatullu niviarsiaqqat 28 %-ii.
AAMMA ATUARUK Kommunit tamarmik meeqqat atuarfiat pillugu suleqatigiinniartut
Suliniuteqartuusut suliniutertik ”Chat Paaralugu – Sikker Chat”-imik taaguuserpaat atuartitsinermilu atugassanik nittartakkamillu, nunatsinni ilinniartitsisut atuartullu tamarmik alakkarsinaasaanik, suleqatigiinnikkut ineriartortinneqarluni.
- Meeqqat suliamut akuunissaat pingaaruteqarpoq. Taamaammat atuartitsinermi atortussanik nangartaanerunngitsunik ilinniartitsinerunngitsunillu suliaqarpugut, taakkuli meeqqat misiginneqatiginnissinnaanissaanut peqqinnartumillu ataatsimoornissaannut sungiusaanikkut tapersiisussaapput, nunatsinni Red Barnetimi siulersuisuni siulittaasoq, tarnillu pissusianik ilisimasalik, Jonna Ketwa oqarpoq.
Atortut taakku atuarnerup aallartinnerani atuarfinni atorneqarsinnaalissapput, maannakkullu meeqqat atuarfiini ilinniartitsinermi sungiusaatitut misilerarneqaleruttorlutik.
AAMMA ATUARUK Ipadsit iluaqutaallutillu ajoqutaasinnaapput