AWG nuannannissamut pilikannissamullu qaaqqusivoq

Arctic Winter Gamesimi, ulluinnarni AWG-mik naalisarneqartartumi, pisortap, Maliina Abelsenip oqarneratut, One Year To Go-lu ammarlugu siggartaat siggarpat, nuannallunilu pilikattoqassaaq.

Aaqqissueqataasunut ilaasup Arina Kleistip ullumi pisussanik pillugit ima KNR Radioaviisimut oqaluttuarpoq.

-Tassa assigiinngitsorpassuarnik pisoqartussaavoq, kulturikkut aliikkusersuinerit, Inussivik tamaat atortussaavarput, timersuutit timersuutigineqartussat awg-p ingerlanneqarnerani, taakkulu ilai misilinneqarsinnaassapput, soorlu strafferlutik isikkammik isertitseriarnerit aammalu inuit pinnguaataannik misiliinerit, Arina Kleist KNR-mut taama oqarpoq.

Aamma atuaruk Nuuk AWG2016-imut kingumut kisitsilluni aallartippoq

Arctic Winter Games taamatut aaqqissuussivoq, issittumi timersornissaannut kulturikkullu katerisimaarnissaannut ukiup ataasiinnanngornera malugeqqullugu, tusaqqullugulu kajumissuseq tunngavigalugu sulisussarpassuit aallarteqqajaalermata. 

-Tassa taamatut aaqqissuussivugut, Arctic Winter Games avammut nittarsaanniarlugu, aamma AWG 2016-ip suuneranik paasititsiniaaniarluta, taavalu kajumissutsiminnik suleqataarusuttut kajumissaarlugit, ullumikkut tallimanngornermi allatsissinnaanngussagamik.

One Year To Go-mut aaqqissueqataasoq Arina Kleist tusarparput. Taassuma Inussivimmi ilisarnarsinnaasunik pinnguaqataasussanik naapitassaqassasoq neriorsuutigaa.

AWG-ip pisortaata Maliina Abelsenip naapisimaarnerup ilisarnaatissaa erinarsuut nalunaaqutaq arfinermut nalunaarutigissavaa.

Ualeru Inussivimmut takkuttut, periarfissaqassapput unammisitsinernut ilaanissaminnut.