ASSIT: AWG-mut peqataasussat ima ineqassapput
Artic Winter Games Comittee kiisalu peqataasussat sumiiffiiniit assigiinngitsuneersut sinnerlugit aallartitat sapaatip akunnera naammat ataatsimiipput, isummatik apeqqutitillu eqqartorniarlugit.
- Ingerlalluarpoq isummanik, eqqarsaatinik, suliassanik nuataanik, assigiingitsunik siunnersorneqarlutalu pivugut, taanna iluartorujussuuvoq, Arctic Winter Games 2016-mi pisortamut tullersorti Arnakkuluk Jo Kleist taama oqarpoq.
Timersortartut 1400 tikittussat Nuummi meeqqat atuarfiini tallimani najugaqassapput, AWG-ilu siniffinik quleriinnik 900-nik qinnuteqareersimavoq.
Inuusuuttorpassuillu ineqartinniarnissaannut najooqutassaqarpoq, malittarisassat, tikeraartussat ineqarniarneranut tunngasut, sukangasuut, soorlu siniffit angissussaannut tunngasut, siniffiit qanoq ungasissuseqassappat allalu.
- Arctic winter gamesiminngaaniik malitassaqarpoq init taakkua assigiinngitsut unnuiffiusussat amerlanerpaamik qassiusinnaanersut inimi ataatsimi, taakkulu malillugit pilersaarusiorpugut, Arnakkuluk Jo Kleist taama oqarpoq.
Aamma atuaruk Nuup angallaviginissaa ajornannginnerulersinniaraat
Meeqqat atuarfii unammiuaartitsinermi matoqqassapput.
Atuartulli aqqusinerni angalaaginnassanngimmata, sammisassanik assigiingitsunik aaqqissuillutik, Arnakkuluk Jo Kleist oqarpoq.
- Meeqqat workshoppertinneqarnissaat, tassa allarluinnarmik ilikkagaqarsinnaallutit sapaatip akunnera taana ingerlanerani, taava eqqumiitsuliortut assigiinngitsut Arctic Winter Gamesimi arlaatigut peqataasussat, peqataanerata saniatigut meeqqanut taamatut ilinniartitsinissaat pilersaarusiorparput maanakkut, Arctic Winter Games 2016-imi pisortamut tullersorti Arnakkuluk Jo Kleist taama oqarpoq.
Arctic Winter Gamesimut inuit 2200 missaat tikissapput, taakkunannga 1400-t timersortartuullutik.