Avatangiisit pitsanngorsarneqarnissaannut atortussanut aningaasanik immikkoortitsisoqarpoq

Avatangiisit pitsanngorsarneqarnissaannut atortussanut, Avatangiisinut, Pinngortitamut Inatsisinillu atuutsitsinermut Naalakkersuisoq Mala Høy Kúko katillugit, 14,4 millioner koruuninik immikkoortitsivoq.
Assi © : Nauja Møller
juulip 13-at 2015 13:59

Taakkunannga 10 millioner koruunit kommunini avatangiisinut atortunik pitsaangorsaanissamut atugassatut immikkoortinneqarlutik.

Aningaasat ilaatigut illoqarfinni annerni arfinilinni eqqakkanut ikuallaaviit teknikkikkut misissorneqarnerinut atugassaallutik. Taamaaliornikkut kommunini eqqakkanik ikuallaaviit siunissaq ungasinnerusoq eqqarsaatigalugu pisariinnerusumik ikuallaaviit aserfallatsaalineqarlutillutillu avatangiisinik mingutsitsinnginnerunissaat anguniarneqarluni.

Illoqarfinni nunaqarfinnilu ikuallaaviinni dioxinimik annertuumik ullumikkut aniatitsisarput tamaannalu peqqissutsimut avatagiisinullu annertuumik kingunerlutsitsisinnaavoq, Pinngortitamut Avatagiisinullu Naalakkersuisoq, Mala Høy Kúko tusagassiuutinut nalunaarummini allappoq.

Aamma atuaruk Naalakkersuisoq avatangiisit pillugit immikkut suliniuteqalersoq

Qaanaami Qasigiannguanilu eqqakkanut ulorianartunut tigooraaveqalissaaq.

- Kommunit eqqagassalerinermi ikiorsersinnaagatsigit nuannaarutigaarput, aammalu suliniutit assigiinngitsut maanna aallartinneqartussat malinnaaffiginissaat qilanaaraarput, naalakkersuisoq Mala Høy Kúko oqarpoq.

Taassumali erseqqissaatigaa, kommunit eqqakkanik suliaqarnermi atortunut aningaasalersuinissamut peqataanissaat piumasarineqarmat.

Qaqortumi eqqakkanut ikuallaavik aserorterummik nutaamik pisaassaaq. Maniitsumi Sisimiunilu ikuallaaviit eqqakkanik asiutitsivinnik containerersuarnik pisaartinneqassallutik. Kommuneqarfik Sermersooq ballenut naqitsissummik pisaartinneqartoq, Ilulissani Aasiannilu igalaaminernik saviminernillu katersuiveqarfimmik pisaarnissaat tapiiffigineqassalluni.