- Pinngortitamut imaluunniit avatangiisinut sunniutissai, maannakkut projekti eqqarsaatigalugu, Tanbreezimut tunngasumut allanngungaarnikuunngillat, taamaammat taanna tunngavigalugu naalakkersuisunit akuersinissarput ingerlassimavarput, aatsitassanut naalakkersuisoq KNR-imut oqarpoq.Assi: KNR / Malik Brøns

Avatangiisinik illersuisut aatsitassarsiortoqarnissaa kamaatigigaat: Ernumanartorujussuuvoq

Avatangiisinik illersuiniaqatigiit Noap aamma Urani Naamiup Tanbreezip nunatta kujataani aatsitassarsiornissamut akuersissuteqarfigineqarnera ilorrisimaarutiginngilaat. Naalakkersuisup akuersissuteqarneq illersorpaa.

Aatsitassarsioqatigiiffik, Tanbreez Mining Greenland Naalakkersuisunit piiaanissamut akuersissuteqarfigineqarpoq.

Tanbreezip aatsitassarsiornissamut matusinissamullu pilersaarutit amigaatigai

 

  • Ingerlatseqatigiiffik Naalakkersuisunit piiaanissamut matunissamullu pilersaarummik akuersisoqarnissaanut 2022-mi decembarip ulluisa 31-annut periarfissaqarpoq.

  • Pilersaarut isumannaannissamut avatangiisinullu piumasaqaataasunut sukumiinerusunik ilaatigut imaqassaaq.

  • Piianissamut akuersissut ukiuni 30-ni atuutissaaq.

Aatsitassarsioqatigiiffik nunatta kujataani Killavaat Alannguanni sumiiffimmi 18 kvadratmesterisut angitigisumi eudialytinik piiaanissamut akuersissuteqarfigineqarpoq.

Tamanna Kommune Kujalliup minnerunngitsumillu Tanbreezip 2012-imili akuersissuteqarfigineqarnissamut utaqqilersimasup nuannaarutigaat.

Kikkulli tamarmik nuannaarutiginninngillat. Avatangiisinik illersuiniaqatigiit Danmarkimeersut nunatsinneersullu ernumapput.

Avatangiisinik illersuiniaqatigiit: Tusarniaanerit nalunaarusiallu pisoqalisut

Illersuiniaqatigiit Urani Naamiup aamma danskit avatangiisinik illersuiniaqatigiiffiata, NOAH-p Naalakkersuisut tusarnarniaanernik nalunaarusianillu 2013-imeersunik tunngaveqarlutik akuersinerat eqqarsarnartoqartippaat. Pisoqalisimasut taakku isumaqarput.

ASN pillugu paasissutissat:

ASN Avatangiisinut Sunniutaasinnaasunik Naliliineq-mut naalisaataavoq.

 

Avatangiisinut Sunniutaasinnaasunik naliliinermi (ASN) suliniut avatangiisinut qanoq sunniuteqarsinnaanersoq misissorneqartarpoq. Avatangiisinik innarlitsaaliuinissamut inatsit naapertorlugu Naalakkersuisut tamatumunnga akuersiteqqaartinnagit nunami sanaartukkat ilaat aallartinneqarsinnaanngillat allanngortinneqarsinnaanatilluunniit.

 

Inatsisitigut piumasaqaataasut ASN-imut nalunaarusiami naammassineqarsimappata nalunaarusiaq IPN-imut nalunaarusiaq - suliniut inuiaqatigiinnut qanoq sunniuteqarsinnaanersoq pillugu nassuiaatitalik - ilanngullugu tamanut ammasumik tusarniaassutigineqassaaq. Tassa imaappoq, innutaasut suliamut tunngatillugu apeqquteqarsinnaallutillu tusarneqassapput.

 

Paasissutissanik pissarsiffik: Naalakkersuisut

- Tupinnalaartorujussuugami una avatangiisinut sunniutissaat 2013-imi tunniunneqarnikuusut aallaavigerpasillugit naalakkersuisut atuinissamik Killavaat Alannguani tunniussinerat. Taanna tupinnalaartorujussuartut isigigatsigu, Urani Naamik Narsami siulittaasua, Mariane Paviasen oqarpoq.

AAMMA ATUARUK Tanbreez piiaanissamut akuersissuteqarfiusoq: Atsiornissaq amigaataaginnarpoq

- Nalunaarusiaq 2015-imeersoq itigartitsissutigineqarami nutaamik nalunaarusiortoqaruni akuersissummik aatsaat tunisisoqarsinnaassasoq piumasaqaatigineqarpoq. Taamaaliortoqaranilu maanna akuersissuteqartoqarpoq, tamannalu ernumanartorujussuusoraarput.

Naalakkersuisoq: Nalunaarusiat suli atuupput

Avatangiisinulli sunniutissanik naliliinerup tusarniaanerullu nalunaajaatiginerat 2013-imeersut suli pisoqalinngillat.

- Ilumoorpoq tusarniaaneq 2013-imi ingerlanneqarnikuuvoq, aatsitassanut naalakkersuisoq, Jens Frederik Nielsen (D) oqarpoq.

- Pinngortitamut imaluunniit avatangiisinut sunniutissai, maannakkut projekti eqqarsaatigalugu, Tanbreezimut tunngasumut allanngungaarnikuunngillat, taamaammat taanna tunngavigalugu naalakkersuisunit akuersinissarput ingerlassimavarput, aatsitassanut naalakkersuisoq KNR-imut oqarpoq.

- Naalakkersuisut akuersinavianngillat nalunngikkunikku avatangiisinut sunniuteqassasut ajortumik. Soorunami isumaqaratta misissuinerit naammattut, isumaqaratta avatangiisinut sunniutissai aatsitassamut inatsimmut kalluaanngimmata akuersisugut.

AAMMA ATUARUK Tanbreez: Suliat ilungersunartut maana aallartipput

Taassuma avatangiisinik illersuiniaqatigiit suliniutip pinngortitamut sunniutissai pillugit ernumassuteqarnerat paasisinnaavaa. Suliniulli avatangiisinut kingunerluuteqartussaagaluarpat suliiniut akuerineqarnavianngikkaluartoq oqaatigalugu.

- Ernumassuteqarnerat soorunami tusaatissatut tiguarput. Isumaqatigiinngilagut, tamannalu ajunngilaq. Kisianni akuersissuteqarnerput, kujataanilu aatsitassarsiornerup aallartissinnaalernera nuannaarutigaarput.

- Neriuppugut suliniut pitsaasumik sunniuteqarumaartoq, uanilu oqaatigerusuppara Naalakkersuisunit nalunngikkutsigu tamanna avatangiisinut sunngiuteqarnerlukkumaartoq taama aatsitassarsiornissamut akuersissuteqarnavianngilagut. Inatsisinik unioqqutitsinngitsoq isumaqaratta akuersissuteqarpugut, Jens Frederik Nielsen oqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat