Tanbreez piiaanissamut akuersissuteqarfiusoq: Atsiornissaq amigaataaginnarpoq

- Tanbreez piiaanissamut akuersissummik nuannaarutaaqisumik pissarsivoq, tamannalu annertuumik, ajunngitsumik pingaarutilimmillu Kommune Kujallermut nunattalu sinneranut ineriartuutaasinnaavoq.

Aatsitassanut naalakkersuisoq, Jens Frederik Nielsen (D) tusagassiuutinut nalunaarummi oqarpoq.

AAMMA ATUARUK Tanbreezip kujataani suliniutaata piviusunngornissaa qanilliallattoq

Aatsitassarsiorfik Tanbreez sumiiffimmi 18 kvadratkilometerinik annertussuseqartumi aatsitassanik eudialytinik piiaassaaaq, Naalakkersuisut allapput.

Piiaanissamulli akuersissut suleqatigiinnissamullu isumaqatigiissut aatsaat atsiorneqareerpata suliaqartoqalersinnaavoq.

2023-nngortinnagu piiaanissamut matusinissamullu pilersaarut

- Piiaanissamut matusinissamullu pilersaarummik kiisalu ingerlatassanut pilersaarutinik suliaqarnissaq tullinnguuppoq. Pilersaarutit taakkua suliarineqarnerat, ingerlatseqatigiiffiup aamma Naalakkersuisut akornanni qanimut suleqatigiinnikkut ingerlanneqassaaq.

- Ingerlatseqatigiiffik Naalakkersuisunit piiaanissamut matunissamullu pilersaarummik akuersisoqarnissaanut 2022-mi decembarip ulluisa 31-annut periarfissaqarpoq, akuersissut taanna isumannaallisaanermut avatangiisinullu tunngatillugu apeqqutinut piumasaqaataasunut sukumiinerusunik ilaatigut imaqassaaq, Naalakkersuisut tusagassiuutinut nalunaarummi allapput.

Piiaanissamut atuersissut ukiuni 30-ni atuutissaaq.

Naalakkersuisut Tanbreezip, Kommune Kujalliup, Namminersorlutik Oqartussallu suleqatigiinnissaat aamma akuersissutigaat.

Tanbreez australiamiut ingerlatseqatigiiffigisaat ujaqqanik aatsitassanillu qaqutigoortunik ujaasisarpoq. Ingerlatseqatigiiffik Qaqortup eqqaani Killavaat Alannguani misissuinissamut ilaatigut akuersissuteqarfiuvoq.