Tanbreezip kujataani suliniutaata piviusunngornissaa qanilliallattoq
Killavaat Alannguanni suliassamut suleqatigiinnissamut isumaqatigiissut pillugu isumaqatigiinniarnerit aallarteqqinneqassasut, Aatsitassanut Suliffeqarnermullu Naalakkersuisup kiisalu Tanbreez Mining A/S-imit aammalu Kommune Kujallermit aallartitat akornanni aggustip ulluisa 19-ianni ataatsimeeqatigiinnermi isumaqatigiissutigineqartoq, naalakkersuisoqarfik allappoq.
Suliassap inuiaqatigiinni piujuartussamik iluaqutaasumik sunniuteqarnissaanut nassuiaammut (VSB-mut nassuiaat) missingiut nutartigaq kingulleq Tanbreezip nassiummagu, isumaqatigiinniarnerit aallarteqqinneqarput.
Aatsitassanut naalakkersuisup, Erik Jensenip, pisut nutaat nuannaarutigai.
- Suliami akuusut tamarmik Tanbreezip aamma Kommune Kujalliup akornanni suleqatigiinneq aallaavigalugu ukioq manna imaluunniit ukiup tulliata aallartinnerani pimoorussillutik angusaqarniarsarissasut, aammalu Kommune Kujallermi innuttaasunut iluaqutaasumik siuariartortitsisinnaassasoq aammalu suliffissanik pilersitsiviusinnaassasoq, qularutiginngilara, Erik Jensen oqarpoq.
Allaffissornikkut suliassaqarfiit arlallit, ”one-door”-imut, maannakkut ataatsimoortinneqarnerisigut suliat ingerlaneri eqaannerulersinneqarlutillu sukkanerulersinneqarsinnaasimasut, naalakkersuisup isigaa.
Tanbreezimeersup Greg Barnesip suliffeqarfiup suliniutaata angusaqarfiuleriartornera nuannaarutigaa.
- Tassami USA-p Kinallu niuernikkut sorsuunnerat, Tanbreezimut suliniutiminut periarfissiilluarmat, suliffeqarfiup suliniutini aallartilertorumavaa. Tamatumani suliniummi aatsitassat qaqutigoortut piiarneqartussat allalu, Kinap piiaanermigut kisermaatipajaagai, pivagut, Greg Barnes oqarpoq.
