- Coronaviruseqanngitsuuppat akuersissut atsioriartorlugu Kalaallit Nunaannut timmisartorlunga maanna aallareersimassagaluarpunga, Greg Barnes oqarpoq.

Tanbreez: Suliat ilungersunartut maana aallartipput

Aatsitassarsiutileqatigiiffiup Tanbreezip saffiugassanik qaqutigoortunik Qaqortup eqqaani piiaanissaata Naalakkersuisunit akuersissutigineqarnera, Tanbreezimi pisortap Greg Barnesip nuannaarutigaa. Pilersaarusiornerillu aallartipput.

Aatsitassarsiutileqatigiiffup pisortaata, Greg Barnesip, Kujataani Killavaat Alannguanni saffiugassanik piiaanissaminnut akuerineqarnertik nuannaarutigaa.

AAMMA ATUARUK Tanbreez piiaanissamut akuersissuteqarfiusoq: Atsiornissaq amigaataaginnarpoq

Aatsitassarsiutileqatigiiffiup Tanbreezip nunaminertami pilerigineqaqisumi piiaanissaminut piiaanissamut matusinissamullu pilersaarusiamik akuersissuteqarfigineqarnissani amigaatigiinnalerpaa.

Ilungusunartumik sulineq maanna aatsaat aallartittoq, pisortaq oqarpoq: 

Tanbreez Qaqortup eqqaani aatsitassanik piiaanissaa

 

  • Nunatta kujataani Killavaat Alannguanni sumiiffimmi 18 kvadratkilometerimik annertussuseqartumi piiaanissamut qinnuteqaat piareerpoq.
  • Aatsitassarsiorfik, Tanbreez sumiiffimmi eudialytinik piiaassaaq.
  • Aatsitassarsiorfik ujaqqerivittut pissuseqartumik akuiagassamik ukiumut 500.000 tonsiusumik piiaaffigineqassaaq.
  • Piiaanissamut atuersissut ukiuni 30-ni atuutissaaq.

Tusarfik: Naalakkersuisut / Kommune Kujalleq

- Aatsitassarsiornissaq akuerineqaraangat suliassat ilungersunartut, soorlu anigaasaqarnermut allarpassuarnullu tunngasut aallartittarput, tamannalu nalinginnaasuuvoq. Akuerisaanissarput qularisimavarput, akuerisaaqqammerlutali. Tusarluarsimaalaariarluta pilersaarusiorluta aallartissaagut, Greg Barnes oqarpoq.

Aatsitassarsiutileqatigiiffik piiaanissaminut maanna aningaasaliiussarsiortussanngorpoq. Tamannali coronap nunarsuaq tamakkerlugu tunillaassuunnera peqqutigalugu imaaliallaannaq qulakkeerneqarsinnaanngilaq.

- Coronaviruseqanngitsuuppat akuersissut atsioriartorlugu Kalaallit Nunaannut timmisartorlunga maanna aallareersimassagaluarpunga, taanna oqarpoq.

Pisimasut eqqarsaatigisanngikkai

Greg Barnesip Naalakkersuisut piiaanissaminnullu sivisuumik utaqqinertik siusinnerusukkut isornartorsioreeraluarai eqqarsaatigisanngilai.

Australiamiut aningaasaannik 50 millionit dollarsinik (danskit aningaasaannik 225 millionit koruunit missaannik) ukiut arfineq-pingasut ingerlaneranni aningaasartuuteqareeraluarlutik akuersissutisinertik nuannaarutigaa.  

AAMMA ATUARUK Kommunip aatsitassarsiornermik suliniut nuannaarutigigaa: Suliffissarpassuaqartitsissaaq

- Siumut isigerusunneruvunga. Piluusaartoqarsimaneranut uparuartuerusunngilanga.

- Piffissaq sivitsungaatsiareermat akuersissuteqarneq nuannaarutigaara, sapaatip-akunnerani oqarsinnaalissagunarpunga - piffissatorfigeqqinnavianngilara, soqutiginarnerusullu assersuutigalugu aatsitassarsiorfiup pilersaarusiornissaa ingerlateqqilersinnaassavakka, Tanbreezip pisortaa, Greg Barnes oqarpoq.

Suliarinneqqaarfissanik sanaartortoqassanngitsoq

Aatsitassarsiorfimmi pilersaarutigineqaraluartutut suliarinneqqaarfeqassanngilaq.Suliarinneqqaarfissarli najugaqartunit akerliliiffigineqareerneratigut unitsiinnarneqarpoq.

- Kalaallit Nunaanni suliarinneqqaarfimmik sanaartortoqassanngilaq. Tassunga pissutaasut amerlapput. Siullertut suliarinneqqaartussamik nunatta kujataanut angalasoqassaguni tassanngaannartumillu putsilinngikkuni silarlulerpat suliarinneqqaartussaq suliassaminut kinguaattuussaaq, Greg Barnes oqarpoq.

- Aamma suliarinneqqaarfimmit eqqagassaqarnissaa perusunngilarput, pingaartumik UNESCO-p allattorsimaffiani kulturikkut eriagisassanngortitat eqqaanni.

Tanbreezip saffiugassiassaq nunanut allanut suliarinneqqaartarfimmut assartortarniarpaa.

Tanbreez sumut assartuisalissanersoq Greg Barnesip suli ilisimanngilaa.

- Marlunnik pingasunilluunniit periarfissaqarpugut, taakku maannakkut eqqartorusuppallaanngilakka. Kisianni Amerikap avannaanut Europamulluunniit assartuisoqartassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat