Kommunip aatsitassarsiornermik suliniut nuannaarutigigaa: Suliffissarpassuaqartitsissaaq
- Tassa soorunalimi nuannaarpugut. Kiisami akuesissut taanna sivisuumik utaqqisimasarput nalliuppoq.
Kommune Kujallermi borgmesteri, Kiista P. Isaksen (Siumut) taama oqarpoq.
Aatsisassarsiorfiup Australiameersup Tanbreezip Nalakkersuisunit saffiugassanik qaqutigoortunik Qaqortup qanittuani Killavaat Alannguanni piaasinnaanissaa akuersissutigineqarpoq.
Aatsitassarsiorfiup piiaanissamut matusinissamullu pilersaarusiamik akuersissuteqarfigineqarnissani nunaminertami pilerigineqaqisumi piiaalernissaminut amigaatigiinnalerpaa.
Tanbreez Qaqortup eqqaani aatsitassanik piiaanissaa
- Nunatta kujataani Killavaat Alannguanni sumiiffimmi 18 kvadratkilometerimik annertussuseqartumi piiaanissamut qinnuteqaat piareerpoq.
- Aatsitassarsiorfik, Tanbreez sumiiffimmi eudialytinik piiaassaaq.
- Aatsitassarsiorfik ujaqqerivittut pissuseqartumik akuiagassamik ukiumut 500.000 tonsiusumik piiaaffigineqassaaq.
-
Piiaanissamut atuersissut ukiuni 30-ni atuutissaaq.
Tusarfik: Naalakkersuisut / Kommune Kujalleq
AAMMA ATUARUK Tanbreez piiaanissamut akuersissuteqarfiusoq: Atsiornissaq amigaataaginnarpoq
Suliffissaaleqisut amerliartortut
Naatsorsueqqissaartarfimmit kisitsisit naapertorlugit Qaqortumi aatsitassarsiorfiup sumiiffigisassaani suliffissaaleqisut juulimi 149-upput. Qaqortumi suliffissaaleqisut siorna juulimi 93-upput. Qaqortumi inuit 2.790-it missaanniittut najugaqarput.
Tamannalu allanngortinniarlugu aatsitassarsiornermut suliniutit piaartumik akuerineqartarnissaat borgmesterip kissaatigaa.
- Sunaluunniit suliffik ammaraangat imaluunniit suliffissanik pilersitsigaangat suliffissaaleqinerit appartissinnaasarpaat, Kiista P. Isaksen oqarpoq.
Tanbreezimit aatsitassarsiornissamut naliunaarusiat naapertorlugit suliniutip sanaartornermut immikkoortoq inunnut 30-nit 140-nut suliffissaqartitsissaaq.
Aatsitassarsiorneq ingerlanneqalerpat inuit 80-it missaanniittut aatsitassarsiorfimmi aalajangersimasumik suliffeqassapput.
Tanbreez: Qularnaveeqqusiinerunngilaq
- Naatsorsuutigivara suliffissat amerlassasut, Kiista P. Isaksen oqarpoq nangillunilu:
- Ilaatigut sanaartorneqarnerani qaatitsisoqarneranilu suleqataasussat, maskiinanik ingerlatsisissat, ujaqqanik immikkoortiterineq, kiffartuussinermut pilersinneqarnermut tunngasunik sulisut, igasut eqqiaasut allarpassuillu.
AAMMA ATUARUK Tanbreezip kujataani suliniutaata piviusunngornissaa qanilliallattoq
Naak Borgmesteri suliffissaaleqinerup apparnissaanik neriuuteqaraluartoq, neriuutaa piviusunngussanersoq qularnarpoq.
Tanbreezimi nammineq allappoq, aatsitassarsiorfik sulisartunit, allani suliffeqareersunit ornigarneqarnissaa ilimanarnerusoq.
- Suliffissaaleqisut Tanbreezip sanaartornermi ingerlatsinermilu suliffissaqartitsineranik atorluaasinnaanerat periarfissaavoq. Suliniutilli allani suliaqarfinni sulisooreersut soqutiginninnerulersissagai ilimanarnerpaavoq.
