Eqikkaaneq: Takornariat peqqinnissaqarfimmukartarnerat attartornermullu inatsisip ataatsimoortinnera

Aluukkut, Inatsisartut tallimanngornermi oqaluuserisaat uani eqikkarneqarput.

Atuarluarisi.

Politikerit, sapaatip akunnerata pisoqarfiusimasup saniatigut, oqaluuserisassatut siunnersuutit ukiaanerani ataatsimiinnermut saqqummiussimasaat tallimanngornermi oqaluuserineqarput. 

Tassani Anna Wangenheimip takornariat innarluutilinnullu tapersersuinermut tunngatillugu siunnersuut ukkataraa, ineqarnerli takornariaqarneruleraluttuinnarneralu aamma oqaluuserineqarput. 

Takornariat peqqinnissaqarfimmukarsinnaanerat

Peqqinnissamut Inunnullu Innarluutilinnut Naalakkersuisup Anna Wangenheimip (D) siunnersuutaa siulliullugu oqaluuseraat, tassa takornarissat nunatsinni peqqinnissaqarfimmi sullinneqarnermikkut akiliisinneqartarsinnaanerat pineqarpoq. 

Politikerilli Atassummeersup Bentiaraq Ottosenip inuit nunani allani ilinniartut sivikitsumilluunniit tikeraartut siunnersuummit sunnerneqassannginnerat pingaartippaa. 

Tamanna Anna Wangenheimip (D) isumaqatigaa. 

Partiit tamarmik siunnersuummut isumaqataapput, siunnersuullu Inatsisartuni Ilaqutariinnermut Peqqissutsimullu Ataatsimiititaliamut suliarineqartussanngortinneqarpoq.

Attartornermut inatsit ataatsimoortinneqassaaq

Attartornermut inatsit, siunissami paasinarninngorniassammat, ataatsimoortinneqarnissaa oqaluuserineqarpoq. 

Inatsimmi maannakkut atuuttoq ukiuni arlalinni arlaleriarluni allanngortinneqartarpoq. 

- Taamaalilluni arlalinnik malittarisassaqalerpoq, tamannalu paasinarpiarunnaarpoq aamma tamakkiisumik najugaqarfinnik inissiaqartitsinermik maannakkut aaqqissuussineq ersersinneqanngilaq. 

- Siunnersuutip malittarisassat ataatsimoortillugillu nutarsassavai taamaalillutik ataatsimut inatsisartuni inatsisinngussapput. Siunnersuutip inatsisit atuuttut pingaarnertut ingerlateqqissavai, ataasiakkaanilli allannguuteqassallunilu erseqqissaanertaqassapput, Ineqarnermut, Attaveqaasersuutinut, Isorliunerusunut Upalungaarsimanermullu Naalakkersuisoq oqallinnerup aallartinnerani oqarpoq.

KNR-ip ukiaanerani ataatsimiinnermi oqaluuserineqarsimasut naatsukkuutaarlugit piffissami aggersumi allaaserisassavai.