Avataanit tikisitsigasuartoqartalernissaa assigiinngitsumik tiguneqartoq

Najugaqarnissamut sulinissamullu akuersissutit utaqqeqqaanngikkaluarlugit allanit suliartortartut nunatsinnut tikinniutaa qanittumi sulisalersinnaalissapput. 

Tamannali aatsaat pisinnaavoq suliffeqarfik, nunanit allanit suliartortup suliffigisassaa, Namminersorlutik Oqartussanit suliffissaaleqisut ikilisimaneranni nunanit allanit suliartortunik tikisitsigasuarnissaminut siumoortumik akuerineqarsimapput.

Tamanna pisinnaalerpoq sulisoqarnermut naalakkersuisup, Mimi Karlsenip (IA) nunanit allanit suliartortunik tikisitsinissamut suliaqartarnerup sukkanerusumik aaqqissuunneqartarnissaanut danskit naalakkersuisuinut isumaqatigiissuteqareersorlu. Aaqqissuussineq septembarip ulluisa 24-anni atuutilissaaq.

Aaqqissuussinerlu taanna sulisitsisut sivisuumik anguniarsimallugulu kissaatigisarisimavaat. Taama Sulisitsisuni pisortaq Christian Keldsen oqaluttuarpoq.

- Pissutsit piviusut tassaapput sulisussaaleqisoqarmat aamma Kalaallit Nunaanni sumiiffinni amerlanerni suliffissaaleqisoqanngilaq, oqarpoq.

Keldsenillu oqarnera naapertorlugu taamaammat sulisitsut tamarmik ilungersunartumiipput. Sulisitsisunit taamaammat nuannaarutigineqarpoq nunatta avataanit sulisussanik tikisitsisarnerup suliffeqarfinnut maanna pisaannerulertussanngornera, nunatsinniinnissamummi sulinissamullu akuersissutinik qinnuteqartarnerit allaffissornikkut sivisuumik suliarineqartartut avaqqunneqarsinnaalerput.

AAMMA ATUARUK Fasttrackimik aaqqissuussineq inissittoq: Nunanit allanit sulisoqarniarneq ajornannginnerulerpoq

- Suleqatigiinnermi taama angusaqartoqareernera nuannerpoq, maannami isumaqatigiissut suliat suliarineqartarnerut sivikillisaataasussaq ingerlaannartumik atuutilertussaavoq, Namminersorlutimmi Oqartussat tusarniarneqaqqaartarnerat utaqqineqartarunnaassaaq suliffeqarfinni siumoortumik akuerineqareersimasuni tikitsisoqarniaraangat, Christian Keldsen oqarpoq.

Sulisartut aningaasarsiat ernumagivaat

Nunanit allanit suliartortussanik tikisitsisarnerup sukkanerusumik suliarineqarsinnaalernera inuiaqatigiit ineriartornerannut siuariartornerannullu sunneeqataajumaartoq Naalakkersuisut neriuutigivaat. 

Naalakkkersuisunut ilaasortaq Mimi Karlsen tusagassiuutinut nalunaaruteqarluni sisamanngornermi taama oqarpoq.

Taamaakkaluartorli sulinermik inuussutissarsiuteqartut kattuffiata, SIK-ip, aaqqissuussaq suli akerlerivaa.

- Isumaqatiginngitsorujussuuara. Sumiiffiimmi ilaanni suliffissaaleqisoqarpoq. Sooq taava taakkunannga sulisussanik tikitsisoqarsinnaanngila? Ajornanngippallaaqaaq taamatut avataaninngaanniit tikisitsipallaannarnissaq, Jess G. Berthelsen, SIK-ip siulittaasua, taama oqarpoq.

Mimi Karlsenip sisamanngornermi oqaluttuaraa Namminersorlutik Oqartussat suliffeqarfinnik siumoortumik akuerineqallarsinnaasunik nalunaarsuilerusttortut.

Taassuma oqarnera naapertorlugu nalunaarsuiffimmi ilaanissamut piumasaqaataavoq akissarsiat atorfeqarnermilu atugassat Kalaallit Nunaanni pissutsinut tulluuttuunissaat, aamma sulinermi immikkut isigisariaqartunik peqarnissaa, soorlu immikkut ittumik piginnaasalinnik amigaateqarneq.

Jess G. Berthelsenilli ernummatigivaa sulisartut kattuffiannut aningaasarsianik isumaqatigiinniarnerni siunissami qaffaasoqarnissaanut piumasaqarsinnaanerup ajornarnerulernissaa. 

AAMMA ATUARUK Nunanit allaneersut suliartornissaannut suliat sukkanerunissaat sanaartornermut iluaqutaassaaq

- Aamma taanna aningaasarsiat qaffanniarnerannut eqquisinnaavoq. Thailandermiut Filipperinermiullu sulisitsisupalaanut naammagittaalliornavianngillat. Nalunnginnamikku naammagittaalliorlutik soraarsitaagunik qaammatit pingasut qaangiutsinnagit angerlartinneqarsinnaallutik, oqarpoq.

Taamaammat Jess G. Berthelsen isumaqarpoq sulisitsisut nunaqavissunut akissaatitik taarsiullugu pilerinarsartariaqaraat. 

- Unammillernermi maannakkut atuuttoq qiviarutsigu, soorlu assersuutigiinnarlugu Royal Greenlandip aamma Polar Seafoodip akornanni, taava imminnut unammillerniarlutik akinik qaffaasarput. Taamaakkaluartorlu suliffissuarni taama pisoqarneq ajorpoq, oqarpoq naggasiillunilu:

- Isumaqatigiissuteqarpugut. Kisianni kialluunniit nangartanngilai isumaqatigiissutaasunit qaffasinnerusumik akissaateqartitsinissaannut. 

Nunanit allanit suliartortussanik tikisitsisarnermut isumaqatigiissutigineqartoq nutaaq atorunnaarsinneqarsinnaavoq suliffissaaleqisut piffissami aalajangersimasumi amerlanerulerulerpata, taamaalinerani nunatsinni sulisussarsinissaq ajornannginerulissammat.