Fasttrackimik aaqqissuussineq inissittoq: Nunanit allanit sulisoqarniarneq ajornannginnerulerpoq
Nunatsinni suliffeqarfiit nunanit allanit sulisussanik ajornaannerusumik sukkanerusumillu aallersinnaalissapput.
Sulisoqarnermummi Naalakkersuisup, Mimi Karlsenip (IA) Danmarkimi Nunanut allanut nunasisullu ilanngutivinnissamut ministereriat, Mattias Tesfaye isumaqatigiissuteqarfigaa.
Isumaqatigiissut fasttrackimik aaqqissuussinermut tunngavoq, taannalu suliffeqarfiit sulisussaaleqiffiup nalaani nunani allamiunik sulisussarsisinnaanissaannut periarfissiissaaq. Aaqqissuussineq septembarip ulluisa 24-anni atuutilissaaq.
Assi: Naalakkersuisut. Mattias Tesfaye aamma Mimi Karlsen.
Tamanna isumaqarpoq qinnuteqartoq Kalaallit Nunaannukarsinnaasoq suliartorluni, nunamut angalasinnaasoq sulilerlunilu, Namminersorlutik oqartussat qinnuteqaammut akissutissaat utaqqeqqaanngikkaluarlugu. Aaqqissuussineq atuutissaaq piffinni suliffissaaleqinerup annikilleqqanerata nalaani.
Suliffeqarfiit Namminersorlutik Oqartussat suliffeqarfinnik akuerineqarallarsinnaasunik allattorsimaffianniinnissaat pisariaqarpoq.
Mimi Karlsen nuannaartoq
Naalakkersuisut tamatuma saniatigut fasttrackimik aaqqissuussineq suliffissaaleqisoqarnerani nunatsinneersunik sulersitsisoqarnissaanut ajornannginnerulersitsiniarnikkut unitsikkallarneqarsinnaasoq allappaat.
- Nuannerpoq danskit Nunanut allanut nunasisullu qallunaanut ilanngutivinnissamut ministeriat, Mattias Tesfaye naapillugu, marluullutalu isumaqatigiissummut akuersaarpugut, ministeriaata naapinngilaarnerani naammassisimasaanut.
AAMMA ATUARUK Nunanit allaneersut suliartornissaannut suliat sukkanerunissaat sanaartornermut iluaqutaassaaq
Isumaginninnermut Sulisoqarnermullu Naalakkersuisoq, Mimi Karlsen tusagassiuutinut nalunaarummi allappoq, nangillunilu:
- Fasttrackimik aaqqissuussinikkut, Naalakkersuisut neriuutigivaat inuiaqatigiinni ineriartornerup siuariartorneranullu sunneeqataasinnaasoq. Nuannerpoq suliffeqarfiit nunanit allaniit sulisussanik amigaateqartut, sulisussaminnik amigaatigisaminnik sulilersitsisinnaanisaminnut periarfissaqalermata siornatigorniik sukkanerusumik.
Namminersorlutik oqartussat suliffeqarfinnik akuerineqarallarsinnaasunik allattuipput. Allattuiffimmiissinnaanissamut piumasaqaataavoq, akissarsiat atorfeqarnermilu atugassat Kalaallit Nunaanni pissutsinut tulluuttuunissaat, taavalu sulinermi immikkut isigisariaqartunik peqarnissaa, soorlu immikkut ittumik amigaateqarneq.