Avannaata Kommuniani utoqqaat siunnersuisoqatigiivi nutaat maanna pilersinneqartut
Avannaata Kommuniani utoqqaat siunnersuisartui nutaat pilersinneqassapput.
Tamanna kommunalbestyrelsip oktobarip aallaqqaataani ataatsimiinnerani aalajangerneqarpoq.
Lena Ravn Davidsen (Demokraatit) siunnersuuteqartuuvoq, taassuma utoqqaat politikkikkut tusarniaavigineqartarnissaat neriuutigaa. Tamannalu kommunalbestyrelsimi isumaqatigiissutigineqarluni akuerineqarpoq.
Lena Ravn Davidsenip aalajangiineq utoqqarnut tunissutaanerarlugu ataatsimiinnermi naggasiutigalugu oqaaseqarnermini oqaatigaa.
- Suliap suliarineqarnera nuannaarutigaara, utoqqaammi ullumikkut ulloraat. Taamaammat tamanna kommunalbestyrelsimit utoqqarnut tunissutaasoraara.
Iluatsinngitsoorsimasoq
Kommunimi utoqqarnut siunnersuisoqatigeeqarnikuuvoq, sulisussaqarniarnerli aningaasassaqarnerlu pissutigalugit matuneqarnikuulluni.
Aalajangiinermi nutaami Ilulissani, Uummannami, Upernavimmi Qaanaamilu utoqqarnut siunnersuisoqatigiinnik pilersitsisoqassaaq.
- Utoqqarnut siunnersuisoqatigeeqarnikuuvoq, taakkuli qinigaaffimmi matumani ingerlasimanani. Ilaqutariinnut susassaqarfimmi sulisoqarnikkut ilungersuasoqarnera pissutigalugu utoqqarnut siunnersuisoqatigiinnik pilersitsisoqarsinnaasimanngilaq, Lena Ravn Davidsen oqarpoq.
Isumalluutissaqarniarneq pissutigalugu ataqatigiissitsisinnaanngereerlusi maanna qanoq ilillusi aningaasassalerpisi?
- Maannakkut immikkoortortaqarfimmut allamut peqatigiiffinnik isumaginnittartumut inissipparput, peqatigiiffiillu aqqutigalugit utoqqaat peqatigiiffii assigiinngitsut suleqatiginissaanut periarfissaqarluni.
Knud Kleemannip (Atassut) aningaasaqarnermut ataatsimiititaliaq sinnerlugu siunnersuut akueralugu ataatsimiinnermi oqaatigaa.
Nunaqarfiit amigaataasut
Ane Qujaukitsup (Siumut) nunaqarfinni utoqqaat aamma tusarniarneqartarnissaat pingaaruteqartoq kommunalbestyrelsip ataatsimiinnerani erseqqissaatigaa.
Oqaaseqaallu taanna Lena Ravn Davidsenip isumaqatigaa.
- Ilumoorpoq nunaqarfiit soorunami ilanngunneqassapput, illoqarfiit nunaqarfiillu qaninnerit tusaaniarneqassapput.
Peqqinnissamut Sunngiffimmullu ingerlatsiviup nunaqarfinni utoqqarnut siunnersuisoqatigiinni pilersitsiviussanngitsuni utoqqaat tusarniaavigineqartarnissaat isumagissavaa. Avannaata Kommunia siunnersuut pillugu eqikkaanermi taama allappoq.
Utoqqaat Siunnersuisoqatigiivi qaqugu aallartinneqassanersut ilisimaneqanngilaq, Lena Ravn Davidsenilli Ilulissani siunnersuisoqatigiit siulliullugit pilersinneqarnissaat naatsorsuutigaa.