Avannaani sanaartorneq Svanep annertuseqquaa
Jess Svanep isornartorsiorpaa Ilulissani siornali inissialiassaagaluit 24-it unitsinneqartut suliluunniit sanaartorneq aallartinngitsoq.
Suliaq aamma taamaaqataanik Sisimiuni Qaqortumilu inissialiornermi nassataqartussaagaluartoq suliarinnittussarsiuunneqareerluni unitsinneqarpoq. Ilimanarpoq illuliassat aningaasaliissutaasut sipporlugit akeqartussanngorsimagaluartut.
Jess Svanep saaffiginnissutaani takuneqarsinnaavoq suliassaq unitsnneqarmat Qaasuitsup Kommuniani suliffissaqartitsiniarnermut aningaasaqarnermullu assut sunniuteqarsimasoq, suliallu unitsinneqartup qaavatigut 20-20-60 atorlugu illuliorneq unitsinneqarmat aamma eqqugaareersimapput.
Jess Svane ilanngullugu ajusaarnarnerarpaa allakkatigut oqarasuaatikkullu kommuuni arlaleriarluni saaffiginnittaraluarluni akineqarneq ajormat. Tassani paasiniarneqarsimagaluarpoq sooq Nuup avataani sanaartorneq unitsinneqarsimanersoq.
Ilanngullugu piumasaraa sanaartugassanut Namminersorlutik Oqartussat aningaasaliissutaat siunissami ingerlaannaq kommuuninut tunniunneqartalissasut. Taamaasilluni sanaartornissap pilersaarusiornera ingerlanneralu pisinnaammat. Jess Svanep Namminersorlutik Oqartussat assut avoqqaarai kommuuni pilersaarusiaannut ataqqinninngippallaarnerarlugit.
- Tamanna akuersaarneqarsinnaanngilluinnarpoq, Qaasuitsup Kommuuniani borgmesteri Kuupik Kleistimut allappoq.
