Avannaani qassusersorneq killilersulerpaat
Qaasuitsup Kommuniani qaleralinniat qassusersorsinnaanerat killilerneqartussanngorpoq januarip aallaqqaataannit apriilip 30-iata tungaanut taamaallaat pisinnaanngorlugu. Qassusersorneq aamma pisinnaassaaq novemberip aallaqqaataaniit decembarip 31-ata tungaanut.
Taamatut killilersuineq pisussanngorpoq qaammatinut sisamakkaartunut pisassiissutit nungulertorneqarpallaartarnerat pinngitsoorniarlugu. Uummannamut pisassiissutit nungunneqarput aggustip 15-at nutaanillu aatsaat pisassaqaleqqissaaq oktobarip aallaqqaataani taakkulu ukiup naaneranut atuutissapput.
Kommunabestyrelsemi amerlanerussuteqartut taamatut aalajangerput kommunalbestyrelse septembarip arfernat ataatsimiimmat malittarisassallu nutaat ukiortaamiit atuutilissapput. Siunnersuut saqqummiunneqarpoq Naalakkersuisut attaveqarfigineqartareersut, taamaattorli Qaasuitsup Kommuniani Siumukkut siunnersuummut akerliupput.
Siumut taamatut sukaterinissamut peqataajumanngilaq siunnersuut pillugu tusarniaanissaq pitsaanerusoq pisimasariaqarsorigamikku.
Qaasuitsup Kommuniata maanna Naalakkersuisut tungaannut ujartorpaa tunisassiat tamakkiinerusumik Qaasuitsup Kommuniani suliarineqartarnissaannik pilersaarut.
Avannaani qaleralinnik tunisassiorfiit 23-iupput. Taakkunannga marluinnaat tisasarput sinnerisa qalerallit niaquiinnariarlugit nunani allani suliareqqitassatut nassiuttaraat.
2009-mi qalerallit 15.217 tonsit avammut nioqqutigineqarput taakkunanngalu taamaallaat 5.607 tons tisallugit siatassanngorlugit suliarineqarsimapput.
Qaasuitsup Kommuniata Naalakkersuisunut qinnutigisimagaluarpaa Uummannap eqqaani ukiup sinneranut pisassanit 500 tonsit maanna pisassanngorlugit nikisinneqassasut. Qaasuitsulli kommunalbestyrelseani ataatsimiinnermit imaqarniliaq malillugu suli Naalakkersuisunit tamanna akineqanngilaq.
Qaasuitsup Kommunia har søgt Naalakkersuisut om at flytte 500 tons af kvoten for Uummannaq fra 4. kvartal til 3. kvartal. Men henvendelsen er endnu ikke blevet besvaret ifølge referatet fra kommunalbestyrelsesmødet den 6. september.
