Avannaani eqqaaveqarneq iluarsineqassappat ima akeqassaaq
Eqqagarsuit eqqakkallu siornarnitsat amerliartuinnaramik illutsinninngaanniik immaqa meterinik tallimaanarnik ungasissuseqalerlutik, Tasiusarmioq Daniel Løvstrøm KNR-imut 2016-imi taama oqarpoq.
Imaluunniit:
Oqaasissaaleqinarporluunniit. Tupinnarpoq takullugu nunaqarfik taama eqqagassaqartigisinnaammat tipeqarujussuarlunilu, Birgitte Møldrup KNR-imut sapaatip akunnerata siuliani taama oqarpoq.
Aamma:
Sumilu tamaani katersatut ipput puussiat qernertut sungaartullu. Anartarfiit puukui, Marianne Egedep Tasiusami pissutsit takusimasani pillugit taama oqaluttuarpoq.
Tassa Avannaata Kommuniani eqqaavilerinermut ajornartorsiutaasartut pillugit knr.gl-ip ukiuni kingullerni allaaserisarsimasarpassuisa ilaat.
Avannaata Kommunia aamma nammineq eqqaavilerinermut anartarfilerinermullu isumaginninnerminut sumiginnaasimavoq.
Taama Niels Davidsen (IA) sapaatip akunnerani uani nassueruteqarpoq. Taanna Avannaata Kommuniata teknikkimut ataatsimiititaliaani, eqqaavilerinermut anartarfilerinermullu akisussaasuusumi, siulittaasuuvoq.
AAMMA ATUARUK Avannaani eqqakkat ajornartorsiortitsipput - suliniummut ilaasortanngoqqittoqarusulerpoq
Avannaata Kommunia kommunit peqatigiillutik eqqagassalerinermut ingerlatseqatigiiffianut - ESANI A/S-imut, kommunip 2019-imi pilersitseqataaffigisaanut, pilersinneqarneraniilli qaammatit qulinngulerneranni kommunip qimataanut, ilaasortanngoqqeratarsinnaavoq.
Kommunalbestyrelsimi taamani isumaqarpoq suliniummi peqataanissaq kommunimut akisuallaassasoq.
Kisianni Niels Davidsenip oqarnera naapertorlugu kommunip ESANI A/S avaqqussinnaanngilaa.
ESANI A/S
- Nunatsinni kommunit tallimat ataatsimoorlutik eqqagassalerinermik ingerlatseqatigiiffik 2019-ip upernaavani pilersippaat, kisianni Avannaata Kommunia qaammatit qulingajaat qaangiuttut ilaasortaajunnaarpoq.
- Ingerlatseqatigiiffiup Nuummi Sisimiunilu ikuallaaviit nutaat marluk ingerlanneqarnerat isumagissavaa.
- Tamanna Nunatsinni eqqagassalerinermik pitsaanerulersitsissaaq avatangiisinullu mingutsitsinnginnerulluni.
- 400 millionit koruuninik akeqassaaq.
- Sisimiuni ikuallaavissap nutaap 2022-mi piareernissaa Nuummiittussallu 2023-mi piareernissaa naatsorsuutigineqarpoq.
- Ilulissani, Aasianni, Nuummi, Sisimiuni Qaqortumilu ullumikkut ikuallaaveqarpoq.
ESANI A/S imaluunnit naamik: 135 mio. koruunit
Kisianni kommunip eqqaavilerinermut tunngatillugu ajornartorsiutit uteqqiattuartut, ingasammik isorliunerusuni, qaangerniarlugit iliuuseqassaguni 135 millioni koruuninik aningaasartuuteqartariaqarpoq.
Aningaasallu taakkua kommunip piginngilai.
Taakkuali 135 millioni koruunit aningaasartuutigineqartussat, kommuni ESANI A/S-imut ilaasortaappat ilaasortaanngikkaluarpalluunniit aningaasartuutigineqartussaapput.
Taama Palle Jerimiassen (attaviitsoq) borgmesteriusorlu oqarpoq.
Kommunilu ESANI A/S-imut ilaasortanngussaguni eqqakkanut ilitsivissanik pilersitsiortortariaqarpoq, eqqakkat taakkua Nuummut imaluunniit Sisimiunut, illoqarfinni taakkunani marlunni ESANI A/S ikuallaavissualioreerpat, umiarsuakkut nassiunneqartartussaammata.
Foto: Birgitte Møldrup
Kommunip eqqagassalerineranut aaqqiissutaasinnaasoq akikinnerpaaq sorliua?
- Taanna akisinnnaanngilara. Imaakkami 135 millioni koruunit aningaasartuutissatut taasakka ESANI A/S-imiikkaluarutta imaluunniit ilaanngikkaluarutta, inuttaasunut pitsaasumik atugassartitsissagutta eqqaaveqarnerlu aaqqiivigissagutsigu aningaasartuutigisussaavagut, Palle Jerimiassen oqarpoq.
Taannalu isumaqarpoq inuit ilaat ESANI A/S oqaluuserineqaleraangat paatsuungalertartut. Palle Jerimiassenimi isumaqarpoq inuit ilaat isumaqartut kommunit eqqagassalerinermut ataatsimoorlutik suliniutaata eqqagassalerineq tamaat isumagiumaaraa. Kisianni taamaattoqanngilaq, oqarpoq.
- ESANI A/S-ip suliassatuaa tassaavoq kommunip suliarisimasaanik umiarsuarmik Nuummi Sisimiuniluunniit ikuallaavinnut ingerlateqqinneqartussanik assartuisarnissani.
Sukkanerusumik iliuuseqarnissamut aningaasat pisariaqarput
- Imaanngilaq eqqaaveqarnermi massakkut ajornartorsiutigut, soorlu sulisoqarniarnikkut atortutigullu ajornartorsiutit, imaaliallaannaq aaqqissinnaagai.
- Kommunimit naatsorsornikuuarput eqqakkanut ilitsivissat, nunaqarfinni aqquserngit iluarsartuunneqarnissaat kiisalu poortuinernut tunngasut ingerlatissagutsigit aningaasat 135 millioni koruunit atortariaqartussaassallutigit. Taannalu kommunip aningaasartuutigisussaassavaa, Palle Jerimiassen oqarpoq.
Avannaata Kommunia
- Kommune 10.820-nik innuttaqarpoq, taakkua illoqarfinni sisamani nunaqarfinnilu 21-ini najugaqarput.
- Innuttaasut eqqagaasa suliarineqartarnerat ukiumut 30 millioni koruuninik akeqartarpoq.
- Innuttaasullu atuisutut akiliuteqarnermikkut 21 millioni koruuninik akiliuteqartartut, kommuni 9 millioni koruuninik tapiisarpoq.
Taamaattumik taassuma erseqqissarpaa kommunip eqqaavilerinermut ajornartorsiutit iluarsiiviginissaanut ukiut arlallit atortariaqarai.
Kisianni aamma sukkanerusumik iliuuseqartoqarsinnaavoq kommune avataanit tapiiffigineqarsinnaappat, borgmesteri avatangiisinut naalakkersuisumik, Kalistat Lundimik (IA), sapaatip akunnerata siuliani ataatsimeeqateqarsimasoq, taama oqaluttuarpoq.
- Taamaattumik Kalistat Lundip oqaloqatiginerani oqarpunga aaqqiinissat sukkanerusumik ingerlassappata Miljøfondimit aqqusinernut eqqakkanullu aningaasaliisarnerit annertunerusut pisariaqartikkigut, Palle Jerimiassen oqarpoq.
Palle Jerimiassenip oqarnera naapertorlugu Avannaata Kommunia kommunip eqqaavilerinermut atugassarititaasunut pitsanngorsaaniarluni sumiiffinni assigiinngitsuni iliuuseqartarsimavoq. Uummannami eqqakkanut tigooraavik 10 millioni koruuninik akilik suliarineqarsimavoq. Aappilattumi aqqusineq siorna 4 millioni koruuninik aningaasaliiffigineqarsimasoq ukioq manna aamma 3 millioni koruunik tapiiffigineqaqqissimavoq.
Kommunip Upernavimmi eqqaavissuup tungaanut aqqusineq aamma iluarsartuussimavaa aamma Ilimanami eqqakkanut tigooraaviliorsimavoq.
Kommunalbestyrelsip kommune ESANI A/S-imut ilaasortanngoqqissanersoq aalajangertussaavaa.
Tamanna kommunalbestyrelsimi ilaasortat missingersuusiornermut septembarimi isumasioqatigiilerpata pissaaq. Tassani aamma ESANI A/S suliniumminut tunngasunik saqqummiisinneqassaaq.
