Tasiusami eqqaavilerisoqarneq aamma ajornartorsiutaavoq

Tipersuaq narlanngunarluinnartoq.

Narsarmiup Marianne Egedep Upernaviup eqqaani Tasiusami aggustip aallartilaarnerani ullut marluk tikeraarsimanerminit tassa eqqaamasaa.

Nunaqarfimmi - siorna aasanerani nalaatamisut  - eqqakkanik anartarfiullu puussiarsuinik katersuisinnaasunik amigaateqarsimavoq.

AAMMA ATUARUK Assit: Birgittep Kullorsuarmi mingutsitsineq tupaallaatigigaa

Taamaalilluni angerlarsimaffimmit ulluinnarni igitanik aamma eqqakkanik annertuunik, soorlu errorsivikunik nalaasaarfikunillu, eqqaavilerisunik nunaqarfiup eqqaavissuanut assartuisinnaasunik sulisussarsisoqarsinnaanngimmat eqqakkat inuit pisuttaarfiisa killinginut ilioraannarneqarsimapput. 

- Sumilu tamaani katersatut ipput puussiat qernertut sungaartullu. Anartarfiit puukui, Marianne Egede illoqarfimmi naggorissup aamma avannaani Tasiup assigiinngissutaannut tupigusuutiginnittoq, taama oqaluttuarpoq.

Eqqaavilerisut atugaat

Namminersortut marluk Tasiusami eqqaavilerinermik anartarfilerinermillu ingerlataqarsimagaluarput. Taakkuali marluullutik juunip 20-ata missaani soraarsimapput. 

Tamatuma kingorna eqqakkat aamma anartarfiit puussiarsui nunaqarfimmi 256-inik innuttaqartumi  katersorneqaannalersimapput.

Taama oqaluttuarpoq Regine Bidstrup, Tasiusap aamma Nutaarmiut nunaqarfiisa aqutsisuini siulittaasoq.

AAMMA ATUARUK Tasiusami eqqakkat ajornartorsiutaaqqilersut

Kommune eqqaavilerinermik anartarfilerinermillu suliaqartussamik aasap ingerlanerani sulisussasiorsimagaluarpoq, kisianni soqutiginnittunit neqeroortoqarsimanngilaq.

- Periarfissaq unaarpasilerpoq eqqaavilerisarnermut anartarfilerisarnermullu tunngasunut nalilersueqqittariaqalernissarput. Tassalu eqqagassalerinermik suliaqarneq qanoq soqutiginarsarniarneripput, Regine Bidstrup, eqqaavilerisut anartarfilerisullu sulinerminni atugaasa  pitsanngorsaavigineqarnerisigut suliassap pilerinartunngortinneqarsinnaaneranut isumaqartoq, taama oqarpoq.

Regine Bidstrupup aningaasarsiat aamma eqqumaffigineqartariaqariaqarnerarpai.

- Maannakkut neqeroortitsinermi akikinnerpaaq siulliunneqartuaannartarpoq. Namminersortulli taamatut aningaasarsiaqarluni sulineq akilersinnaanngitsoq malugileraangamikku tunuartertarput, Regine Bidstrup oqarpoq.

AAMMA ATUARUK Kullorsuarmi mingutsitsineq: Eqqaavilerisut Ilulissaniit tikisinneqalerput

- Taavalu atortutigut. Traktorinik aamma aqqusineqarnikkut pitsaasumik atugassaqartitsilluni suliffik nuannersunngortillugu soqutiginartunngortinneqarsinnaassangaluarpoq, oqarpoq.

Tasiusami eqqaavilerisarneq anartarfilerisarnerlu Kullorsuarmisut ATV'nik usisaatilinnik ingerlanneqartarpoq.

- Igitassat annertungaaramik pinngitsoorani traktorinik atortaqartariaqavikkaluaramik. Nukippassuit atugassaangamik. Taamaammat suliassaq taama angitigisoq uggornaraluartumik ornigineqartanngilaq, Regine Bidstrup oqarpoq.

Regine Bidstrup oqarnera naapertorlugu Avannaata Kommunia eqqaavilerisunik Tasiusaliartitsiniarpoq.

Kommune Kullorsuarmut aamma taamaaliorniarpoq, Kullorsuarmimi eqqaavilerisut aamma amigaatigineqarsimapput. Avannaata Kommunianilu teknikkeqarnermut ataatsimiititaliap siulittaasuata, Niels Davidsen (IA), oqarnera naapertorlugu eqqagassalerinermut tunngasuni ataavartumik aaqqiissutaasinnaasumik kommune maanna ujartuileruttorpoq.

- Aamma sulisussaqarneq aaqqiivigineqartariaqarpoq. Imaattariaqannginnamimi tamakkua innuttaasut suliarissagaat. Naamik, sulisussat pigineqartariaqarput. Aamma tamanna qanoq naammassineqarsinnaanersoq paasinialeruttorparput, KNR-imut ataasinngormat taama oqarpoq.