Tasiusami eqqakkat ajornartorsiutaaqqilersut
Upernaviup nunaqarfiisa ilaanni Tasiusami eqqagassalerineq suli ajornartorsiorfiuvoq. Aqquserngit sinaat eqqakkanut anartarfinnilu puussiartarasaarpoq, tamakkua eqqaavissuarmut assartuunnissaqanngimmata.
Nunaqarfimmi aqutsisunut ilaasortaq Regine N. Bidstrup KNR-imut taama oqaluttuarpoq.
- Eqqagassarpassuit sumi tamaaniipput. Angerlarsimaffinnit igitassat nunamilu saliisoqarnikuuneranit eqqagassat. Anartarfiit puussiartaat arlalippassuit eqqaavimmut apuunneqartussaagaluartut, Regine N. Bidstrup oqarpoq.
Taassuma oqaluttuaa ajoraluartumik ilisarnarpoq. Ukiummi sisamat matuma siorna nunaqarfimmi pissutsit taamatorluinnaq inneri KNR-imit allaaseraavut.
- Sila kissakkaangat igalaalluunniit mappersimaneq ajornarsipput, niviugassuarnik, nunaqarfippullu tippakkami, Tasiusarmiu Daniel Løvstrøm taamani oqarpoq.
Atortussaaleqisut
Eqqagassalerineq Avannaata Kommuniata namminersortunut suliakkiunnikuuaa. Sumiiffiit ilaanni tamanna iluatsikkaluartoq Tasiusami ajornartorsiutaavoq.
Sulisussaaleqineq unammillernarnerpaanut ilaasoq Regine N. Bidstrup oqarpoq. Suliassat inuup ataatsip suliarisinnaasaanit amerlaneruneri atortigullu ajornartorsiuteqarneq aporfiusarput.
- Nunaqarfiit ilaanni sulisut marluugunik pitsaanerussasoq isumaqarpunga, Regine N. Bidstrup oqarpoq.
- Qamutinik assakaasulinnillu atortoqartinneqaraluarlutik aqquserngit pitsaannginnerisa kingunerisaannik assartuutit aserortooraangamik kingoraartissanik pissarsiniarnemi sivisuumik utaqqisarneq eqqagassarpassuarnik nunaqarfimmiittoqalertarneranik kinguneqartarpoq, Regine N. Bidstrup oqarpoq, qamutinillu assakaasulinnik nivaatalinnik atortoqarneq pitsaanerussagaluartoq unnerlugu.
Eqqagassalerinerup ajornartorsiutaanera Avannaata Kommuniani teknikkikkut ingerlatsivimmit nassuerutigineqarpoq. Teknikkimut pisortaagallartup Karl Madsenip allakkatigut KNR-imut tamanna nassuiaateqarfigaa:
- Upernaviup nunaqarfiini eqqagassalerinermi ajornartorsiuteqarpugut. Ilulissaniit Innaarsunnut Kullorsuarmullu eqqagassalerisussanik aasaq manna kommunimit aallartitsinikuuvugut, taanna allappoq.
Tasiusamut Innaarsunnullu eqqagassalerinermut arfininngorpat augustip 15-iani ikiuukkiartortoqassaaq. Taakku saniatigut nunaqarfinni atortutigut suut amigaatigineqarnersut misissuleruttoritik taassuma paasissutissiissutigaa.
Sulisut marluusariaqartut
Eqqagassalerisut marluugunik pitsaanerussagaluartoq, Regine N. Bidstrup, aamma Inuit Ataqatigiit sinnerlugit Avannaata Kommuniani ilaasortaasoq oqarpoq. Naak taamaalioqqusineq kommunimut akisunerussagaluartoq.
- Nunaqarfiit ilaanni sulisut marluugunik pitsaanerussasoq isumaqarpunga. Ikioqatigiinnikkut nunaqarfiup iluani eqqagassanik anartarfiillu puussiartaanik suliaqarneq piffissaq ungasinnerusoq eqqarsaatigalugu pitsaanerussaaq.
- Maannakkut killiffik eqqarsaatigalugu kisimiilluni suliarinissaat oqimaappallaarpoq. Ukiuni kingullerni kisimiilluni sulisitsinerup qanoq ilungersunartiginera misilittagaqarfigereerparput.
Regine N. Bidstrup Kommunip aningaasartuutinut aappaagumut missingersuusiunnginnerani siunnersuusiussalluni oqarpoq.
