Kullorsuarmi mingutsitsineq: Eqqaavilerisut Ilulissaniit tikisinneqalerput
Eqqakkanik saliinermit katersat angisuut, angerlarsimaffinnit ulluinnarni igitat aamma anartarfiit puussiarsui pisuinnaat aqqutaannut seerisut. Taakkualu tamarmik tikki narlanngunarluinnartut.
Tamakku Birgitte Møldrupimut ulluinnarsiutaasimapput Upernaviup nunaqarfiata avannarlersaa aamma anginersaa, 437-nik inuttaqartoq, sulinerminut atatillugu aggustip arfernganit qulingata tungaanut najormagu.
Nunaqarfimmiummi eqqaavilerisua namminersoq soraarsimavoq.
Birgitte Møldrup Kullorsuarmiileqqaarami takusaminut ima tupigusutsigisimavoq qanoq iliuuseqarniarnani eqqarsaqqaarsimagaluarluni.
Kisianni anartarfiit puussiarsuisa seerisut aamma eqqakkat qaleriaat eqqaanni meeqqat pinnguartut takugamigit aalajangersimavoq meeqqat Kullorsuarmi silami avatangiiserisamikkut atugaat pillugit nalunaaruteqarniarluni. Sapaatip akunneranilu kingullermi pingasunngornermi taamaaliorpoq.
- Nalunaarutinni ersarissarpara nalunaaruteqarniaaannarlunga nalunaaruteqanngitsunga, kisianni eqqaaveqarnermut avatangiisinullu tunngasunut atassuteqartoq. Ersarissarniarsimavaralu ernumaninni meeqqat aamma pineqarmata, KNR-imut taama oqaluttuarpoq.
Kommune sumiginnaasoq
Avannaata Kommunia Kullorsuarmi kommunillu inoqarfiini allani eqqaavilerinermut ingerlatsisuuvoq. Kommunilu nammineerluni eqqaavilernut anartarfilerinermullu ingerlatsinerminut sumiginnnaasimavoq.
Taama Niels Davidsen oqarpoq. Taanna kommunip teknikkimut tunngasuni ataatsimiititaliaani, eqqaaveqarnermut anartarfeqarnermullu tunngasuni akisussaasumi, siulittaasuuvoq.
- Teknikkeqarnermut ataatsimiititaliaminngaanniit oqaatigissuara Kullorsuarmi, sumiiffinnilumi allani, eqqaaveqarnermut pissutsit naammaginanngimmata, oqarpoq nangillunilu:
- Aamma oqaatigisariaqarpara kommunip tungaaninngaanniit piffissami sivisuallaami aaqqiissutissanik aaqqiisoqarsimanngitsoq.
AAMMA ATUARUK Assit: Birgittep Kullorsuarmi mingutsitsineq tupaallaatigigaa
Niels Davidsenip oqarnera naapertorlugu Avannaata Kommunianit maanna sulissutigineqaleruttorpoq eqqaavilerisunik Ilulissaniit Kullorsuarmukartitsinissaq, nunaqarfimmimi eqqaavilerinermik anartarfilerinermullu suliaqarsinnaasunik pissarsinissaq ajornartorsiutigineqarmat.
Taamatullu kommunip - Niels Davidsenip oqarnera naapertorlugu - ilisimavaa Kullorsuarmi inoqarfinnilu allani eqqaaveqarnermut tunngasuni ajornartorsiuteqartoqartoq.
Kommunimmi teknikkimut ataatsimiititaliaata Kullorsuami, kommunimilu tamarmi, eqqaaveqarnermut tunngasuni ajornartorsiutit sapaatip akunneri marlungajaat matuma siorna immikkut ataatsimiinnermini eqqartorsimavai.
- Tassani eqqartuivugut siunissami qanorpiaq ataavartumik eqqaaveqarnikkut Avannaata Kommuniani aaqqiisoqarniarnersoq, Niels Davidsen, kommunip piffissami sivisuallaami ajornartorsiummut aaqqiiniarsimannginnera pillugu uparuaaqqittoq, taama oqarpoq.
- Taanna nassuerutigisariaqarparput. Ikuallaagallarnissanut akuersissutit kommunip Namminersorlutik Oqartussanut piniartarsimavai. Kisianni ajornartorsiutinut aaqqiissutaanngilaq. Uanga ataatsimiititaliami siulittaasunngorama taama naqissusernikuuvara, Niels Davidsen oqarpoq.
Innuttaasut nersualaarai
Eqqakkat anartarfiillu puussiarsui Kullorsuarmi sumi tamani takussaasut amerlavallaalermata, innuttaasut ilaat nunaqarfiup eqqaavissuanut nammineq piumassutsiminnik assartuisimapput. Taamaaliornerminnilu Pilersuisup traktoria atorsimallugu.
Nunaqarfimmiullu nammineq piumassutsiminnik iliuuseqarsimanerat teknikkimut ataatsimiititaliami siulittaasumit nersualaarneqarpoq.
- Suliniuteqarsimasut nasaarfigaakka. Kisianni ajornartorsiut qaangerniarlugu aaqqiissutissamik nassaartariaqarpugut, Niels Davidsen oqarpoq.
- Aamma sulisussaqarneq aaqqiivigineqartariaqarpoq. Imaattariaqannginnamimi tamakkua innuttaasut suliarissagaat. Naamik, sulisussat pigineqartariaqarput. Aamma tamanna qanoq naammassineqarsinnaanersoq paasinialeruttorparput.
Niels Davidsenip oqaluttuaraa teknikkimut ataatsimiititaliap immikkut ataatsimiinnermini kommunip eqqaavilerinermut ajornartorsiutit anigorniarlugit suleriaaseq qanoq ittoq atortariaqarneraa ilaatigut eqqartorsimagaa.
