Avannaani eqqakkat ajornartorsiortitsipput - suliniummut ilaasortanngoqqittoqarusulerpoq
Kullorsuarmi aamma Tasiusami eqqakkat qaleriiaaginnalerput.
Ulluinnarsiutit eqqagassartaat aamma anartarfiit puussiarsui seerisut inuttaasunut ajornartorsiortitsisimapput - tamannalu eqqaavilerisussaaleqinermik pissuteqarsimavoq.
- Oqaasissaaleqinarporluunniit. Tupinnarpoq takullugu nunaqarfik taama eqqagassaqartigisinnaammat tipeqarujussuarlunilu, Birgitte Møldrup, Upernaviup nunaqarfiisa avannarlersaanni Kullorsuami sulinerminut atatillugu angalareerluni KNR-imut taama oqarpoq.
Birgitte Møldrupip Nuummut utereerami Naalakkersuisunut Avannaata Kommunianullu meeqqat Kullorsuarmi eqqagassarpassuaqarnerata kinguneranik atugaat pillugit nalunaaruteqarniarluni aalajangerpoq. Sapaatip akunneratalu siuliani taamaaliorpoq.
AAMMA ATUARUK Kullorsuarmi mingutsitsineq: Eqqaavilerisut Ilulissaniit tikisinneqalerput
Tamatuma kingorna KNR-imit aamma allaaseraarput Tasiusami eqqakkat aamma katersuinnarneqartut.
Avannaatalu Kommunia eqqaaveqarnermut tunngasuni isumaginninnermini sumiginnaasuuvoq.
Taama Niels Davidsen (IA) sapaatip akunnerani uani ataasinngornermi nassueruteqarpoq. Taanna Avannaata Kommuniani teknikkeqarnermut ataatsimiititaliaani, eqqagassalerinermut akisussaasumi, siulittaasuuvoq.
ESANI A/S
- Nunatsinni kommunit tallimat ataatsimoorlutik eqqagassalerinermik ingerlatseqatigiiffik 2019-ip upernaavani pilersippaat, kisianni Avannaata Kommunia qaammatit qulingajaat qaangiuttut ilaasortaajunnaarpoq.
- Ingerlatseqatigiiffiup Nuummi Sisimiunilu ikuallaaviit nutaat marluk ingerlanneqarnerat isumagissavaa.
- Tamanna Nunatsinni eqqagassalerinermik pitsaanerulersitsissaaq avatangiisinullu mingutsitsinnginnerulluni.
- 400 millionit koruuninik akeqassaaq.
- Sisimiuni ikuallaavissap nutaap 2022-mi piareernissaa Nuummiittussallu 2023-mi piareernissaa naatsorsuutigineqarpoq.
- Ilulissani, Aasianni, Nuummi, Sisimiuni Qaqortumilu ullumikkut ikuallaaveqarpoq.
Ataatsimiititaliaq ESANI A/S-imut ilaasortanngoqqikkusuppoq
Taamaattumik kommunit ataatsimoorlutik eqqagassalerinermik ingerlatseqatigiiffiannut, ESANI A/S-imut, Avannaatalu Kommuniata 2019-ip naajartulernerani aniffigisaanut, kommunip ilaasortanngoqqinnissaanut innersuussuteqarniarpoq.
Taama Niels Davidsen radiokkut aallakaatitassiaq 'Inuiaat Tillernerat' sapaatip akunnerani uani oqallitsitsimmat oqarpoq.
- Namminersorlutik Oqartussanit kommuninut tamanut nalunaarutigineqarpoq 2024-mi januaarip aallaqqaataanit Kalaallit Nunaanni ikuallaaviit tamarmik ikuallaaqqusaajunnaassasut.
- Taamaasilluni ajornartorsiungaatsiartussaassaagut ikuallaavipput Ilulissaniittorluunniit atorsinnaanngikkutsigu, Niels Davidsen oqarpoq.
Septembarimi isumasioqatigiinnissaq
Kommunalbestyrelsip kommune ilaasortanngoqqissanersoq aalajangertussaavaa. Tamannalu kommunalbestyrelsimi ilaasortat missingersuutit pillugit septembarimi isumasioqatigiilerpata pissaaq. Tassunga aamma ESANI A/S suliniutiminik saqqummiussitinniarlugu qaaqquneqarsimavoq.
- Kisianni aamma ESANI A/S-imut ilaasortanngussagutta eqqakkat qanoq aaneqartarnissaannut aamma ukiuunerani sumiitinneqartarnissaannut piumasaaqateqassaagut, Niels Davidsen oqarpoq.
AAMMA ATUARUK Tasiusami eqqaavilerisoqarneq aamma ajornartorsiutaavoq
Avannaata Kommunia ESANI A/S-imit 2019-imi decembarimi anivoq, taamani kommunalbestyrelsi isummermat suliniummi peqataanissaq kommunimut akisuallaassasoq.
Kommunimmi nammineq eqqakkanut, Nuummut imaluunniit Sisimiunut umiarsuakkut assartorneqartartussanut, peqqumaasivissat nammineq pilersittussaavai ESANI A/S illoqarfinni taakkunani marlunni ikuallaavissuarnik pilersitsereerpat.