Avaleraasartoorniat Finn Karlsenip pakatsissutigigai
Naalakkersuisut pakatsissutiginerpaasaat tassaavoq suliffeqarfiit ataasiinnavimmik siunertaqarlutik avaleraasartoorniarsimanerat.
- Tassalu iluanaaruteqarnissaq, tamannalu assorujussuaq pakatsissutigivara, Finn Karlsen taama allappoq.
Misileraalluni avaleraasartoorniarnermi aalisariutit nunatsinneersut Islandip killeqarfiata eqqaani imartaminermi aalisarsimanerat pakatsissutigalugu nassuiaavoq, Nunatta isuanit Tasiilap sineriaata nalaanut
misileraasoqarnissaa neriuutigisimagaluaramiuk.
AAMMA ATUARUK Avaleraasartoortassat isumaqatigiinniutigineqarnissaat ilungersunassamaartut
- Taamaaliornikkut paasissutissanik pingaarutilinnik pissarsisoqarsimassagaluarpoq, Nunatta avaleraasartoortassanik piumasaqaateqarnissaanut tunngavigisinnaasaanik, naalakkersuisoq taama isumaqarpoq.
Aalisarnerup pilersaarusiorneqarneranut aalisartut peqataarusuttut
Peqatigitillugu misileraalluni aalisarnerup aqunneqarnera pitsaavallaarsimanngitsutut oqaatigaa.
- Ilaatigut aalisarnerup akitsuusersugaanerujussua misigaarput, ilaatigullu aalajangiiniarneq sivisoorujussuulluni, tamatumanilu sinaakkutissat pilersinneqarsimasut aalisarnerup aallartinnissaa sapaatip-akunnerinik arlaqanngitsunik sioqqullugu inaarutaasumik aalajangiinermut atatillugu allanngortinneqarsimallutik, Henrik Leth, aviisimut Sermitsiamut taama oqarpoq.
Aalisarnermili 80.000 tonsingajaat pisarineqarnerat ataatsimut isigalugu Henrik Lethip nuannaarutigaa, aalisarnermullu naalakkersuisoq aappagu pitsaanerusumik angusaqarnissaq anguniarlugu ataatsimoorussilluni pilersaarusiortoqarnissaanut kajumissaarlugu.