Avaleraasartoortassat isumaqatigiinniutigineqarnissaat ilungersunassamaartut
Naatsorsuinerit kingulliit takutippaat, avaleraasartuut Kalaallit Nunaata imartaani qaqutigoortuusinnarlutik ukiut arlaqanngitsut ingerlaneriinnaani amerliariapiloorsimasut.
AAMMA ATUARUK Tunup avataani avaleraasartoorniarneq ingerlalluarpoq
Imaata kiassusia ukiormanna aalaakkaavoq, taamaammat oktobarip qaammataa tikillugu avaleraasartoorniartoqarsinnaanissaa naatsorsuutigaarput, paasissutissallu maanna pigisavut aallaavigalugit avaleraasartoortassat tonsit 100.000-iusut tamakkersinnaanissaat neriuutigaarput, Jørgen Isak Olsen oqarpoq.
Pinngortitaleriffik naapertorlugu, ukiut tulliisa avaleraasartoorniarfiulluarnissaat aamma isumalluarnarpoq. Atlantikup avannaata kitaani aalisagaqassutsimik misissuinerit, Nunatsinnit Islandimillu aggustip qaammataani ingerlanneqartut tamanna takutippaat.
AAMMA ATUARUK Nunatta avaleraasartoorniarnera EU-mit isornartorsiorneqarpoq
Jørgen Isak Olsen naapertorlugu atlantikup avannaata kitaani avaleraasartooqassutsimik misissuinerit takutippaat, taakku 13 procentiisa missaat nunatta imartaaniittut.
- EU-lli avaleraasartoortassat 84 procentiinik piumasaqarpoq, sinneruttut 16 procentit Nunatta, Islandip Ruslandillu akornanni agguarneqartussanngorlugit. Taamaattoqarsinnaanngilarli. Pisassatsinnik pissarsinissarput sapinngisarput tamaat sulissutigiumaarparput, naalakkersuisoqarfimmi pisortaq aviisimut ullormut saqqummersartumut Politikenimut taama oqarpoq.
