ISUMMERSORFIK AVALAK: Pisinnaasat aallaavigalugit atorfinitsitsigitsi
AVALAP Aarhusimi siulittaasua, Daisy J. Iversen isummersorluni allaatigisaa:
Nuna Kalaallit Nunaatut ittoq pitsaanerulersikkusukkaanni, toqqammavigineqartoq pitsaanerusinnaanersoq misissorneqartariaqarpoq.
Atorfinitsitsisoqaraangat kalaallit tunuarsimaarpallaartarput isornartorsiuinngippallaarlutillu, soorlu pisortani pisortatut atorfinitsitsisoqaraangat. Nalinginnaasumilli atorfinitsitsisoqartillugu atorfinitsinneqartup piginnaasai pisinnaasaalu isornartorsiorneqanngippallaartarput.
Paasissutissat: Daisy J. Iversen
- Isumaginninnermut siunnersortitut ilinniagaqarpoq maannalu Aalborg Universitetimi pinerluttulerinermut immikkut ilisimatusarluni
- Savalimmiuni inunngorpoq ukiuni arlalinni Kalaallit Nunaanni najugaqarsimalluni
- Kalaallimik ueqarpoq marlunnillu meeraqarluni
Aalisakkerivimmi immikkoortortaqarfimmi pisortaareerluni inunnik ikiuinermik ingerlatsivimmi inunnik isumaginnittutut suliamut pikkorissuseqarnani ilinniarsimananiluunniiit sulilertoqarsinnaassanngikkaluarpoq. Inuimmi inuunerinik sunniisussanik aalajangiinermik suliaqartarmata, taamaattumik sulerinerluni soorlu taamaaliornerluni nalunngittariaqarpoq.
Kinguaariit nutaat ilinniarsimasunik ilinniartorpassuarnillu ilaqarput. Aaqqissussinerli qajannartillugu sooq utertoqassava?
Suliffimmi ineriartornissamut ilimaginninneq
Ajornartorsiutit aaqqinniagassat amerlaqaat, toqqammaviilli aallartiffigigaanni pitsaasumut aallartoqassaaq. Soorlu, pisortaqarfinni assigiinngitsuni atorfiit suliaminnut tulluuttunik ilinniarsimasunit pisinnaasaqartunillu inuttalernissaat, kalaallinik qallunaanillu.
Pisortatut atorfinitsitsinermi sulisoq sivisunerpaamik sulisimammat pisortanngortinnagu kisiannili suliassamut nammassinninnissamut tulluartoq atorfinitsinneqarli - aamma siunissaq pillugu.
Aningaasarpassuarnik nukippassuarnillu siunissami sipaarutaasinnaavoq, atorfinitsitsinerni ilungersornerugaanni. Inuit siunissaminnut piffissamik annertuumik, nukissanillu aningaasanillu atuisimasut, pitsaanerugajupput akisussaaffimmillu tigusisinnaanngikkunik annaasaqarsinnaanerullutik. Inuit suliffimminnut akisussaanerutikkaanni, suliassamilli naamassinnissinnaanatik - tunniutiinnartarput.
Paasissutissat: AVALAK
Kalaallit Danmarkimi ilinniartut kattuffiat.
Kattuffik Namminersorlutik Oqartussanut Danmarkimi ilinniartut atugarisaat pillugit isumaqatiginninniartarpoq, soorlu nuttarneq pillugu, immikkut tapisiat pillugit, kalaallinullu Danmarkimi ilinniartunut siunnersuisarluni.
Kattuffik Københavnimi, Aarhusimi, Aalborgimi Odensimilu immikkoortortaqarfeqarpoq.
Naammassisat aallaavigalugit akissarsisitsineq
Danskit aaqqissuussaanerat qiviaraanni, New Public Management-imik (NPM) eqqarsartariaaseq saqqumilaarneruvoq, tassani naammassisat isiginiarnerusarpaat. Assigiinngitsunut benchmarkingimik (assersuussineq, aaqqiss.) kattuffiup/suliffeqarfiup assinganik naatsorsuinermi, taamallu qanoq imminut pitsanngorsarsinnaanerluni takuneqarsinnaavoq, atuiffiusunut tulluarpoq.
Kalaallit Nunaanni amigaataalluinnarpoq, nunallu iluani unammillernerup annertusaatigisinnaasaa taamaalillunilu sulisut qanoq naleqarnerlutik takutissinnaallugu, suliffimminnillu illersuisinnaallutik.