Atugarliuutit pillugit sammisaqarnermi susassaqartut tamarmik peqataassasut

Kalaallit Røde Korsiata Ilisimatusarfimmi ilisimatuut peqatigalugit Kalaallit Røde Korsip siunissami sulinissaani atorneqarsinnaasussanik, atugarliuutillit pillugit misissuivoq.

Isumaginninnermik suliaqartut qassiiusut siunissami suleqatigiissinnaanissaat arfininngormat suleqatigiissitsinikkut ammaanneqartoq, Kalaallit Røde Korsiata siulittaasua, Christina Bell oqarpoq:

- Suleqatigiinnerugutta tamattalu sulerinerput nalunngikkutsigu, taava tamakkiinerusumut aaqqiissutissanik suliaqarsinnaavugut, annikitsukkaaginnarnik aaqqiinani ataatsimoortumik annertuumik aaqqiissutaasinnaasut takusinnaassallutigit.

AAMMA ATUARUK Eqqorneqaratarsinnaasut inissisimanertik namminneq pisuussutigigaat

Misissuineq tamarmi islandimiut Røde Korsianit aningaasaliiffigineqarpoq, taamaammat Islandimi Røde Korsimiit eqimattanik suleqatigiissitsinermi aamma peqataasoqarpoq. Taakku nammineerlutik misissuinernik assingusunik tallimanik suliaqarnikuupput.

Islandimi misissuinerit Islandimi Røde Korsip susassaqarfiit siornatigut ukkatarisimanngisaminut ukkatarinninnerulerneratigut suliaat pitsaanerulersimasut, Islandimi Røde Korsimi suliniummi ataqatigiissaarisoq, Nina Helgadottir oqarpoq.

- Assersuutigalugu misissuinermi siullermi tarnikkut nappaat pillugu sammisaqartariaqarluta paasivarput. Tarnikkut nappaatit pillugit paqumiginnikkunnaarsitsiniaasussangorpugut, taanna oqarpoq.

Misissuinerit assigiinngitsut nunasiartortunik inuusuttunillu atugarliuuteqartunik ukkatarinnilersitsisut taassuma eqqaallugit.

Naak Kalaallit Røde Korsiat aatsaat misissuinermik suliaqaraluartut, islandimiut kalaallinit ilikkagaqarsinnaasut, Nina Helgadottir oqarpoq:

- Suliamik alliliinerat ilikkagaqarfigisinnaavarput. Taamaammat tulliani aappaagu misissuinissatsinnut tamanna sunniuteqarsinnaavoq.

Helgadottir oqarpoq, oqaluttuarlunilu, kalaallit atugarliortut pillugit misissuinermi pineqartut - tassa atugarliuteqartut - apersorneqartussani assigiinngitsunut ilanngunneqarsimasut. Periaaserlu taana Nina Helgadottirip Islandimut angerlaanniarpaa.

Filmi piviusulersaarut, atugarliortut pillugit misissuinermut tunngasoq aappaagu saqqummissaaq.