Atuarfik Hans Lyngemi demokrati malunnartinniarpaat
Qinersinermi taasivinnut nakkartitsiviit kommunip atukkiussimavai, atuarfimmilu pedelit taasiartortarfinnik sanasimapput ilinniartitsisut qinersinermi nakkutilliissutut atortussaasut. Tassa qinersineq sapinngisamik piviusorpalaartinniarlugu taamaasiorput. Taakku atorlugit demokrati ilinniartitsissutigineqassaaq.
- Siorna atuartut siunnersuisoqatigiivinut qinersineq iluatsilluarpoq taasisinnaasut 97 procentii taasiartormata. Tamanna iluatsilluarmat ukiormanna aalajangerpugut ulloq demokratip malunnartinniarneranut atorniarlugu. Qineqqusaartut oqallisissapput taamaasillutik atuartut tusaasinnaaniassammassuk qineqqusaartut sunik sulissuteqarniarnersut. Maani atuarfitsinni atuartut siunnersuisoqatigiivi peqataatinniartarpagut arlaannik aalajangigassaqartillugu tamannalu atuartuutitta assut iluarisimaarpaat, ilinniartitsisoq Melissa Hansen aamma demokrati pillugu ataatsimiititaliami ilaasortaq oqarpoq.
Atuarfimmi siunnersuisoqatigiinnut qinersinerup saniatigut atuartut Inatsisartunut pulaassapput tassanilu takornariartinneqassapput oqaluttuunneqarlutillu demokrati qanoq atorneqarnersoq. Atuarfik Hans Lyngemi atuartut minnerit Inatsisartunut ilaasortanit Naaja Nathanielsenimit Inuit Ataqatigiinneersumit aamma Siumumeersumit Per Berthelsenimi pulaarneqassapput. Politikkerit taakku oqaluttuarissavaat politikkimik suliaqarnermi atukkat pillugit.
- Kissaatigaarput atuartut demokrati paasilluassagaat. Taakku namminneq takusatik najoqqutaralugit paasissavaat ilungersuuteqarnikkut sunik angusaqartoqarsinnaanersoq. Qularinngilara atuartut nukarliit atorluarsinnaasaminnik pissarsiumaartut anginerumaallu demokratip sumut iluaqutaasinnaanera paasinerulissallugu, Melissa Hansen Atuarfik Hans Lynge-mi demokratimik malunnartitsiniarnissamut qilanaartoq oqarpoq.
