Atuarfeqarfiup sipaarniarfigineqarnissaa ajornakusoorsinnaavoq

- Atuartut 14 procentimik ikinnerulerpata, taava Atuarfeqarfik akikinnerulernavianngilaq. Kisianni atuartut ikinnerulersimappata taava sipaarutissanik nassaarniarnerput ammaffigisariaqarparput, tamannalu isiginngitsuusaaginnarsinnaanngilarput, aningaasaqarnermut naalakkersuisoq, Maliina Abelsen oqarpoq.

Aningaasaqarnermut naalakkersuisoq, Maliina Abelsen aningaasaliissutinik allamut nuutsitsisariaqalersinnaalluarpoq, maannakkumullu siunniunneqarluni aappaagumut aningaasanut inatsimmi Atuarfeqarfik 16,3 million koruuninik appaavigineqassasoq, taakkulu aningaasat ilaat utoqqarnut aningaasaliissutigalugit.

Naalakkersuisoqataasut Demokraatit taamassumunnga taaseqataaniaratik maannangaaq isummereerput, Inatsisartunut ilaasortaq Anda Uldum, Demokraatineersoq ima oqarpoq:

- Klassi ataaseq atuartunik ikinninnernik atuartoqalerpat imaassanngilaq tamanna sipaarniarfigineqassasoq. Klassimi atuartut ikinneruleraluarpataluunniit ini tassaniiginnaassaaq aamma ilinniartitsisoq ingerlaannassaaq, allatut oqaatigalugu atuarfiup ingerlanneqarnera akikinnerulernavianngilaq. Atuarfik sipaarniarfigineqalerpat naatsorsuutigineqarsinnaavoq atuartitaaneq pitsaasoq appariassasoq, tamannalu uagut perusunngilarput, Anda Uldum oqarpoq.

Illuatungiliuttut Siumukkut aamma tamassumunnga taaseqataaniaratik nalunaareerput, tassalu paasinarsilluni Inatsisartuni amerlanerussuteqartut siunnersuummut isumaqataanngitsut. Anda Uldum ima oqarpoq:

- Atuarfeqarfiup sipaarfigineqarniarnera isumaqatiginatigu Inatsisartuni partiit tamarluinnagajatta oqaatigereerparput, taamaattumik Atuarfeqarfiup sipaarniarfigineqarnissaa pissutissaqanngilaq, Anda Uldum taama oqarpoq.

Aningaasaqarnermut Naalakkersuisup qaammatit tulliuttut isumaqatigiinniarnernut atussavai, taamaattoqassappallu partiit neriuutitik piviusunngortinniassagunikkit siunnersuutinik tunngavilersorluakkanik saqqummiiumaartut Maliina Abelsenip neriuutigaa.