Atualertussat piareersarluarnerutikkusuppaat
PIPp naliliinera malillugu Naalakkersuisut siunnersuut suliarisimavaat nunatsinni meeqqerivinni atukkat misissoqqaarnagit. Tamanna PIPp siulittaasuata Kaaliina Skiftep isornartorsiorpaa.
- PIP isumaqarpoq meeqqeriveqarneq tamaat qulaajarneqartariaqaraluartoq. Tamanna pisimatinnagu meeqqerivinni atukkat nalileruminaatsorujussuupput. Misissuineq kingulleq 2002-mi pivoq, Kaaliina Skifte KNR.gl-mut oqarpoq.
Inatsisissatut siunnersuummi paragraf 19 periarfissiivoq perorsaasutut ilinniarsimanngitsunik meeqqerivinni pisortaqarsinnaanera. Taama pisoqarsinnaassaaq perorsaasutut ilinniarsimasumik pissarsisoqarsinnaanngippat. Tamannali perorsaasut kattuffiata akuersaarumanngilaa.
- PIP-mi isumaqatiginngiarput ilinniarsimanngitsunik pisortaqarnissaaq taakkumi meeqqat illersorneqarsinnaasumik ineriartornissaannut qulakkeerisussaapput. PIP isumaqarpoq pisariaqarluinnartoq pisortaasut perorsaasutut ilinniarsimasuunissaat sulisut ilaat perorsaanermi suliaqarnissamut naammattumik ilisimasaqanngimmata. Ilinniarsimanngitsut atuagarsornikkut misilittakkatigullu Meeqqerivitsialammi anguniakkat naammattumik paasisimanngilaat, Kaaliina Skifte oqarpoq.
Ullumikkut perorsaasut amigaataaqaat taamatullu sulisut inulerisunut allat akissarsiaannut amerlassusaannullu sanilliullugit annikitsuinnarmik qaffattarsimapput. Tamanna pissutaasorineqarpoq perorsaasut amigaataanerujussuannut.
- Kattuffittut soorunami soqutigisaraarput akissaatit sulinermilu atukkat pitsaanerulernissaat taamaasilluni sulisussaaleqineq annikillisinnaammat. Pingaarluinnarporlu ilinniartitsineq tamatumalu kingorna ilinniaqqittuarnissaq, Kaaliina Skifte oqarpoq.
Perorsaasutut naammasserlaaq qaammammut 17.580,45 koruuninik akissarsiaqarpoq tapisiallu 688,74 koruunit ilanngukkaanni katillugit i 18.269,19 koruuninik akissarsiaqarluni.
