Atortunik ajutoornerit amerlanerulissapput
Inuiaqatigiinni tusagassiorfimmi sulisunik soraarsitsisoqassanngitsoq siulersuisuni siulittaasup qulakkeerlugu oqaatigaa, taamaattorli sipaaruteqartoqarnissami tusarnaartartut isiginnaartartullu malugissagaat taassuma ernummatigaa.
- Ajornerpaaq pissappat, teknikikkut ajoqutit aamma akornutit aappagumiit amerlisinnaanerat isiginnaartartunit aamma tusarnaartartunit malugineqarsinnaassapput, KNR-imi siulersuisuni siulittaasoq Nukaraq Eugenius taama oqarpoq.
Taassuma erseqqissaatigaa , KNR-imi sipaarutigineqartussat TV-imi atortunik nutaanik pisinissamut atorneqartussaagaluarput, KNR-illi siulersuisuini siulittaasup siunnersuutigaa, immikkut tapiissuteqarnikkut teknikkimik atortut pisiarineqarsinnaanerat.
Akitsuutit qaffannagit sipaaruteqartoqarpoq
Sipaaruteqarnissaq pisariaqalersimavoq, akitsuutit arlaqartut taakkununnga neqit akitsuuserneqarnissaannik Naalakkersuisuit oktoberimi siunnersuutaat tunuartinneqarmata.
Taakkua taarsiullugit Naalakkersuisoqarfinni aamma pisortat allaffeqarfiini ingerlatsinermut aningaasartuutit sipaaruteqartoqarnissaa aalajangiunneqarpoq.
Aamma atuaruk http://Anda: Soraarsitsisoqannginnissaq qulakkeersinnaanngilara
- Naalakkersuisoqarfiit taakkualu immikkoortortaqarfiini ingerlatsinermut aningaasartuutit tamarmik 2 million kr-nik sipaarfigineqassapput, Aningaasaqarnermut Naalakkersuisuusimasoq Andreas Uldum taama nassuiaateqarpoq.
Kultureqarnermut Naalakkersuisoqarfik procentimik ataatsimik sipaaruteqarnissaanik peqquneqarpoq, tamatuma kingunerisaanik KNR 700.000 kr-nik sipaaruteqartussanngorluni.
KNR-ip siulersuisuini siulittaasup Nukaaraq Eugeniusip uggornartippaa kultureqarnermut tunngassuteqartut sipaarfigineqarmata, taassuma erseqqissaatigaa, inuiaqatigiinnut sullissiviup tamanna iliuuseqarfigisinnaanngikkaa.
- Siulersuisut tungaannit ajuusaarnarpoq, Naalakkersuisut sipaarniuteqarnermik annertuumik piumasaqarneratigut kultureqarnermut Naalakkersuisoqarfik ataatsimoortumik taamatut eqqorneqarmat, Nukaraq Eugenius oqarpoq, kisiannili immikkoortitsinngitsumik ataatsimoortumik sipaarniuteqarneq akueraarput,
Nukaraq Eugenius oqarpoq.