Atornerlunneqarsimasut tappiffigineruniarpaat
Isumaginninnermut siunnersortit, ilinniartitsisut, peqqinnissaqarfimmeersut, politiit aammalu meeqqanik inuusuttunillu ulluinnarni sullissisut allat illoqarfinni nunaqarfinnilu assigiinngitsuneersut Ilulissani pikkorissarput.
Meerarmi kinguaassiutitigut atornerlunneqarsimasoq assigiinngitsunik pissusilersuuteqartarpoq ikiussagaannilu eqqumaffigisassat aamma assigiinngitsorpassuupput:
AAMMA ATUARUK Atornerlunneqarsimasoq ima oqaloqatigiuk
AAMMA ATUARUK Meeqqat pornortarnerat nalinginnaava?
- Ilaatigooriarluta naapittarpagut sullissisut qanoq qisuariassanerlutik nalornisut; ilumut una meeraq kinguaassiutitigut atornerlunneqarsimanersoq, aammalu qanoq iliuusissaaleqisut, Qitiusumik Siunnersuisarfimmi pisortaq Arnajaraq Poulsen oqarpoq.
Taamaammat Isumaginninnermut Aqutsisoqarfiup pikkorissaaneq Danmarkimi Isumaginninnermut Aqutsisoqarfik suleqatigalugu aaqqissuuppaa.
Sullissisullu tarnip pissusaanik ilisimasalinnit, meeqqanik inuusuttunillu kinguaassiutitigut atornerlunneqarsimasut pillugit immikkut ilisimasalinnit, pikkorissarneqarput:
- Qanoq iliussallutik, qanoq suleqatigiissallutik taavalu akisussaaffiit sorliit kia isumagissanerai nalussannginnamikku minnerunngitsumillu pinaveersaartitsineq annertunerusoq anguniarlugu.
Peqataanissamillu soqutiginnittoqaqisoq, pisortap oqaatigaa.
Sullissisut pikkorissarnerat Meeqqat Illersuisuata nuannaarutigaa, neriuutigaalu amerlanerusut siunissami aamma pikkorissarumaartut:
- Meeqqap illersorneqarnissaanut ikiorserneqarnissaanullu pisinnaatitaaffiinut ilisimasaqarfigilluarnissaa qitiulluinnarpoq. Taamaammat assut neriunnaqaaq pikkorissaasarnerit ataavartumik ingerlanneqarumaartut aammalu amerlanerusut periarfissinneqarumaartut, Meeqqat Illersuisuat Aviâja Egede Lynge oqarpoq.
AAMMA ATUARUK Ullut Tamaasa - meeraq naalaaruk
AAMMA ATUARUK Angalaqatigiit atornerlugaasimasunik 500-nik katsorsaasut
Sullissisullumi amerlanerujartuinnartut atornerlunneqarsimasunik siumuillaqqinnerulernissaat anguniarpaat.
- Soorunami neriuppugut paasisatik atorluarsinnaassagaat ingerlateqqissagaallu. Pikkorissaaneq ulluni marlunnuuvoq, kisianni aamma isumaginninnermut aqutsisoqarfimmiit pikkorissaaneq allatut ingerlallugu illoqarfiit assigiinngitsut tikittarpagut, Qitiusumik Siunnersuisarfimmi pisortaq Arnajaraq Poulsen oqarpoq.
Pikkorissartussat 80-init amerlanerusussaagaluarput, timmisartorli kinguaattoormat ikinnerupput.
