Meeqqat pornortarnerat nalinginnaava?

Meeraq inuusuttorluunniit kinguaassiutitigut pissusilersornermigut ajornartorsiortoq qanoq takuneqarsinnaava? Nunatsinni meeqqanut inuusuttunullu sullissisut pikkorissarneqarmata apeqqutit taakkua akineqarput.
Allattoq Sara K. Jakobsen
juunip 02-at 2017 12:02

Meeqqap, marlunniit tallimat tungaannut ukiullip, nukappiaqqat niviarsiaqqallu kinguaassiutaasa assigiinngissusaat misissortarpagu taava nalinginnaasumik pissusilersorpoq taamaattumillu ernumananngilaq.

Meeqqalli kinguaassiutini allanit attoqqusarpagit, inerterneqaraluarluniluunniit killissamik qaangiisarpat, taava pissusilersornera ernumanartuuvoq taamaattumillu akuliuffigineqartariaqarluni.

Nunatsinni qitiusumik siunnersuisarfimmeersut tarnip pissusaanik ilisimasallit Danmarkimeersut suleqatigalugit nuna tamakkerlugu peqataaffigineqartumik apeqqutit taakkua akissutisillugit ulluni makkunani Nuummi pikkorissartitsipput.

- Malunnartarpoq pikkorissaanermi nalornissutigineqartartoq suna nalinginnaasuunersoq, suna pinnguarnerinnaanersoq imaluunniit isumaaluutissaanersoq, Qitiusumik Siunnersuisarfimmi aqutsisoq Arnajaraq Poulsen taama oqarpoq.

Ernumanassutsimut uuttuut

Meeqqat inuusuttullu kinguaassiutitigut pissusilersornermikkut ajornartorsiuteqaraangata pissusilersuutimikkut aalajangersimasunik takussutissaqartartut, Danmarkimi Janus Centretimeersut tarnip pissusaanik ilisimasallit misissuinerisa inerneraat. 

Taakkualu meeqqanut inuusuttunullu sullissisut sakkussaannik, ernumanassutsimut uuttuummik taasaminnik, misissukkat aallavigalugit suliaqarput pikkorissaallutillu.

Ernumassutsimut uuttuut uani alakkarsinnaavat.

- Assersuutigalugu nukappiaraq 15-inik ukiulik nittartakkakkut pornomik ujaasippat, taava alapernaannera immaqa ernumananngilaq. Nukappiararli qulingiluanik ukiulik arlaleriarluni taamaaliorsimappat, taava ernumanarsinnaaneranik assersuutaasinnaavoq, aamma sooq taamaaliornera misissorneqartariaqarluni, Janus Centretimi pisortaq, tarnillu pissusaanik ilisimasalik, Mimi Strange oqarpoq.

Ernumanassutsimut uuttuummi meeqqat utoqqaassusaat pingasunut avinneqarput, taavalu ukiuminnut naapertuuttumik pissusilersortunut, meeqqanut maluginiartarialinnut kiisalu meeqqanut akuliuffigineqartariaqartunut immikkoortiterneqarlutik.  

Sullissisullu taanna aallaavigalugu meeraq kinguaassiutitigut pissusilersornermigut ajornartorsiornersoq paasiniarsinnaavaat. 

Ajornartorsiutit assigiinngitsuusut

Meeqqalli atornerlunneqarsimasuinnaat ajornartorsiuteqalersanngillat, Mimi Strange erseqqissaavoq.

- Allat angerlarsimaffimmi persuttagaasimasarput isiginnittuullutilluunniit. Tamannalu meeqqamut ajoqusiisinnaaqaaq. Allat sumiginnagaasimasarput, allalli inunnguutsiminnik qaratsamikkut ajoquteqartuullutik, soorlu autismemik.

Taamaammat meeraq kinguaassiutitigut pissusilersornermigut ajornartorsiuteqarneranik pasitsaakkaanni tunuliaqutaa paasiniassallugu pingaaruteqartoq, taassuma oqaatigaa:

- Pitsaaqutaa tassaavoq iliuuseqarsinnaalissagatta. Ilisimagutsigu suna misissussanerlutigu, taava meeraq sakkortuumik kanngunarsaasunngornissaa pinngitsoortinniarlugu ikiorsinnaavarput, Mimi Strange oqarpoq.

Meeqqanut inuusuttunullu sullissisut assigiinngitsut 65-it sineriak tamarmeersut pikkorissaqataapput.