Kinguaassiutitigut pissusilersornikkut ajornartorsiortut naammattooruminartilissagaat
Meeqqap, marlunniit tallimat tungaannut ukiullip, nukappiaqqat niviarsiaqqallu kinguaassiutaasa assigiinngissusaat misissortarpagu taava nalinginnaasumik pissusilersorpoq taamaattumillu ernumananngilaq.
Kisianni meeqqap kinguaassiutini allamut attoqqusarpagit, inerterneqaraluarluniluunniit killissamik qaangiisarpat, taava pissusilersornera ernumanartumiippoq taamaattumillu akuliuffigineqartariaqarluni.
Nunatsinni qitiusumik siunnersuisarfimmeersut tarnip pissusaanik ilisimasallit Danmarkimi Janus Centretimeersut suleqatigalugit nuna tamakkerlugu peqataaffigineqartumik apeqqutit taakkua akissutisillugit ulluni makkunani Nuummi pikkorissartitsipput.
Nunatsinni Qitiusumik Siunnersuisarfik naapertorlugu meeqqat inuusuttullu kinguaassiutitigut pissusilersornermikkut ajornartorsiutillit taamatullu meeqqanut inuusuttunullu kanngunarsaanerit Nunatsinni amerlaqaat.
Ajornartorsioraangatalu pissusilersuutimikkut aalajangersimasunik takussutissaqartartut, Danmarkimi Janus Centretimeersut tarnip pissusaanik ilisimasallit misissuinerisa inerneraat.
Taakkualu meeqqanut inuusuttunullu sullissisut sakkussaannik, ernumanassutsimut uuttuummik taasaminnik, misissukkat aallavigalugit suliaqarput.
Ernumassutsimut uuttuut uani alakkarsinnaavat.
Meeqqanut inuusuttunullu sullissisut 65-it sineriak tamarmeersut pikkorissaqataapput, ilaatigut tassaallutik ilaqutariinnut katsorsaasut, isumaginninnermut siunnersortit ikiortillu, perorsaasut tarnillu pissusaanik ilisimasallit.
