Atlantikup avannaaneersut Folketingimi aalajangiisuusinnaasut: Ministeriunermit ataatsimiigiaqqusaapput
Atlantikup avannaaneersut aalajangiisumik Folketingimi inisseqqipput.
Folketingimi ilaasortap Mads Fugledep Venstremit anineratigut, danskit naalakkersuisuisa SVM-imik taagorneqartut, marlunngornermi amerlanerussuteqarunnaarput.
Tamannalu danskit naalakkersuisuisa, ilaasortanit Kalaallit Nunaanneersunik Savalimmiormiuneersunillu amerlanerussuserneqartariaqalernerannik kinguneqarpoq.
Tamanna Kalaallit Nunaata politikkikkut suliani assigiinngitsuni isumaqatigiinniarnerni ajunnginnerusumik angusaqarsinnaaneranut iluaqutaasinnaasoq, IA-p folketingimi ilaasortaatitaa Aaja Chemnitz isumaqarpoq.
IA-lu naalakkersuisooqatigiinnut ernumatitsinavianngilaq.
- Naalakkersuisut tapersersorpavut, aallaqqaataaniillu taamaaliorpugut. Soorlu aamma Kalaallit Nunaannut ajunnginnerpaamik anguniagaqarnerput suli taamaattoq, taanna oqarpoq.
Aaja Chemnitz maanna aalajangiisumik inissisimanissinni danskit naalakkersuisuinut Atlantikup Avannaaneersunut tusaaniarnerunissaat piumasariniarpiuk?
- Ministeriunermik ataatsimeqateqarnissaamik isumaqatigiittoqarsimanera oqaatigisinnaavara, aamma Socialdemokratiet partiillu naalakkersuisuutitaqartut ataavartumik oqaloqatigaagut, taanna oqarpoq.
Ministeriunerullu Mette Frederiksenip qaaqqusisarnera ulluinnarsiutaanngilaq, nalinginnaasumik ministeriuneq qaaqquneqartarpoq.
Allannguutaasinnaavoq
Siumup Folketingimi ilaasortaatitaa Aki-Mathilda Høegh-Dam isumaqarpoq politikerit Atlantikup Avannaaneersut isumaqatigiinniarnernut akulikinnerusumik aggersarneqartalissasut.
- Iluaqutaassaaq, isumaqatigiinniarnerimmi allannguutinik angusaqarfiusarput, taanna oqarpoq.
Qinikkallu aalajangiisumik inissinnerat kalaallit soqutigisaasa salliunneqarnissaannik piumasaqarsinnaalerneranik aamma kinguneqarsinnaavoq.
- Maannumut piumasagut ingerlateqqissavagut. Ersarinnerulernissaalli ilimanarnerulerpoq, taanna oqarpoq.
Danskit naalakkersuisui Socialdemokratinit, Venstremit aamma Moderatinik ingerlanneqartoq maanna 87-iinnarnik ilaasortaatitaqalerpoq, taakkunani attaviitsumut Jon Stephensenimut taaseqataasarnissamik isumaqatigiissut ilaavoq. Danmarkimi naalakkersuisuit amerlanerussuteqarnissaanut ilaasortat ikinnerpaamik 90-iusussaapput.
Savalimmiormiut Folketingimi ilaasortaatitaasa naalakkersuisunik tapersersuinertik aamma oqaatigisareerpaat.
Folketingimi ilaasortat Atlantikup Avannaaneersut nalinginnaasumik nunap iluani politikkimut akuliunnneq ajorput.