Atassutip takornariat Nuummiiginnaqquai
Nuup kangerluani arfernik takornariartitsisarneq illersorniarlugu iliuuseqarnianngilaq, kangerlummi qipoqqaat ornittagannaavimminukartartut piniartunit pisarineqartarput.
Aamma atuaruk Qujaukitsoq: Takornariat arfernik takorusukkunik Maniitsuliarlik
Taama oqariartuuteqartornera partii naalakkersuisoqataasumit Atassumit takornarianillu angallassisartumit siornatigut Naalakkersuisunut ilaasortaasimasumit sakkortuummik akerlilerneqarpoq.
- Turistit amerlasooujussuuit Nuummut tikittartut tassaapput ilaquttaminnut tikeraartartut, taakkua Maniitsuliarnavianngillat aamma Maniitsumut ilaquttaminnut tikeraartartut taakkua amma illoqarfinnut allamukaarnavianngillat, Jens B. Frederiksen taama oqarpoq, - kisianni takornariat Nuummut tikittaraartatut amerlanerit imaalilaannaq aalajangerneq ajorput Maniitsumut imaluunniit illoqarfinnut allamukassallutik, taama oqarpoq Jens B. Frederiksen takornarianik angallamik Nuup kangerluanut angallassisartoq siornatigut Demokraatit sinnerlugit Naalakkersuisunut ilaasortaasimasoq.
Jens B. Frederiksen partiimit naalakkersuisuutitaqartumit Atassummit tapersersorneqarpoq.
Takornariat tikittartut angalanerusalerunik tamatumalu kingunerisaanik akiliinerusalerunik nunatsinnut takornariartartut ikinnerulernerannik kinguneqassaaq, Atassut sinnerlugu Inatsisartunut ilaasortaq Steen Lynge allappoq.
Atassummit aamma tikkuarneqarpoq mittarfinnik angisuunik sanaartornissamut aningaasaliinissamut suliniuteqartoqarnerani ataqatigiissumik politikkeqartoqartariaqartoq, takornariartitsisarneq nukittorsarneqarluni taamaatumillu mittarfiliornissamut tunngavissaqarluarluni.
- Nuuk aamma Nuup Kangerluani arfernik takornariarfiusutut ilisimaneqarluarpoq, taamatut misigisaqarsinnaaneq immikkuullarissutut oqaatigineqarsinnaasoq neqeroorutigisinnaajunnaassappat - illoqarfiit pingaarnersaat nunamiit toqqaannarluni avammut isigaluni arfernik isiginnaarsinnaaneq - taava takornarissat Nuummut takornariarnissaminnut peqqutissaat annikilleriarsinneqassaaq. Taava sooq Nuummi mittarfik allilerneqassava, Steen Lynge Atassut taama aperivoq.
Taamaattummik naammaginanngilaq ataqatigiissoqaranilu Naalakkersuisut taama politikkeqarunik soorlu Inuussutissarsiornermut Naalakkersuisup Vittus Qujaukitsup oqalliffimmi Qulaarpaami saqqummiukkaa
Vittus Qujaukitsoq oqalliffimmi Qulaarpaami ima oqarpoq:
- Ullup ingerlanerani qipoqqaat 30-it tikillugit Maniitsup illoqarfianiit takuneqartarput taamalilluni Maniitsoq illoqarfinnut allanut sanilliullugu qipoqqarnik takusassarsiorfigissallugu pissusisaamisoorneruvoq Vittus Qujaukitsoq oqarpoq, - Nuup kangerlua immikkuullareqqissaartumik piffissami aalajangersimaqqissaartumi arferit takutikkusukkatsigit piniarneqassannginneranik oqartoqarnera uanga peqataaffigisinnaangilara,
Inuussutissarsiornermut Naalakkersuisoq Vittus Qujaukitsoq oqalliffimmi Qulaarpaami tallimanngormat aallakaatinneqartumi taama oqarpoq.