Atassutip siulittaasua siulittaasuuginnassasoq
Aqqalu C. Jerimiassen Atassutip arfininngormat ataatsimeersuarnerani qujalluni oqalugiarsinnaavoq. Taannami Atassummi siulittaasutut ingerlaqqinnissaminut toqqagaaqqippoq.
Partii tusagassiuutinut nalunaarummi ataasinngornermi ualikkut allappoq.
Siulittaasup oqalugiaataa ilaatigut ima ilaqarpoq:
- Annertuumik suliassaqarpugut, akisussaaffillu annertuvoq. Nuannaarutigeqaaralu tamassinnik taperserneqarlunga suliat nangeqqissinnaalerakkit.
Siulittaasoq siumut ingerlatitsisoq
Aqqalu C. Jerimiassenip “Atassut Lars Chemnitzimit siulittaasuuffigineqarnerata kingornali kisimiilluni siuariartortikkaa” partii allappoq,
Partii nalunaarummi ima allappoq: “Lars Chemnitz siulittaasuummalli, Aqqalu C. Jerimiassen Atassutip oqaluttuarisaanerani kisimiilluni Atassut siuariartinnikuugaa, partii allappoq, taamaammallu siulittaasutut toqqagaaqqikkami parteeqatiminit ersaattaanneqarluarpoq.
“Tamakkiisumik tatiginnillutillu ersaartaallutik siulittaasussartik qinersinertaqanngitsumik toqqarmassuk tamanna erserpoq”, tusagassiuutinut nalunaarummi allassimavoq.
Siulersuisut nutaat inissittut
Ataatsimeersuarnermi partiimi nutaanik siulersuisoqalerpoq, taakkulu ima inissisimapput:
- Aqqalu C. Jerimiassen - Siulittaasoq
- Bentiaraq Ottosen – Politikkikkut siulittaasup tullia
- Anna Karen Hoffman – Aaqqissuussaanermut siulittaasup tullia
- Angitinnguaq Schmidt - Ulluinnarni aqutsisut
- Maritha Broberg - Ulluinnarni aqutsisut
- Knud Kleemann – Siulersuisuni ilaasortaq
- Hanne Heilmann - Siulersuisuni ilaasortaq
- Arnanguak Jeremiassen - Siulersuisuni ilaasortaq
Aqqalu C. Jerimiassen Atassummi siulittaasunngornermi saniatigut Naalakkersuisut 2024-mut aningaasanut inatsisissaannik saqqummiussinermi atsioqataaffigisamini peqataavoq. Aningaasanut inatsit politikkikkut taperserneqarluarpoq.
Politikeri parteeqatini Bentiaraq Ottosen peqatigalugu Inatsisartuni ilaasortaapput. Partii Inatsisartunut marlunnik qinigaatitaqarpoq, naalakkersuisoqatigiillu IA Siumullu amerlanerussuteqartuullutik.
