Atassut Tunngaviusumik Inatsisissaq pillugu Isumalioqatigiissitamiit ilaasortaajunnaarniarluni aalajangerpoq
Aningaasat allamut pitsaanerusumut atorneqarsinnaasut Atassut isumaqarpoq taamaattumillu Tungaviusumik inatsisissaq pillugu isumalioqatigiissitamiit aniniarluni aalajangerpoq.
Atassutip siulittaasuat, Aqqalu Jerimiassen taama oqarpoq.
- Maannamut Atassut isumaqarpoq peqataanissaa pisariaqarunnaartoq. Ingammik aningaasat covid-19 nalaani atorfissaqartinneqartut eqqarsaatigalugit. Anigaasat sumut atorfissaqarnerunersut eqqarsaatigilluarnerusariaqaratsigit, aningaasallu tunngaviusumik inatsisissaq pillugu ataatsimiititaliamut atorneqartut allamut atornerorusukkatsigit.
AAMMA ATUARUK Ineqi Kielsenip tunngaviusumik inatsisissaq pillugu isumalioqatigiissitamut siulittaasuunissaa inassutigineqartoq
Ataatsimiititaliap inatsisaanni allaqqagaluarpoq, partiit tamarmiullutik ataatsimiititaliami ilaasortaassasut.
Nunatta naalagaaffeqatigiinnit Danmarkimit Savalimmiunillu peqataajunnaarnissani maannangaaq partiinit piumasarineqanngimmat, namminersulernissaq suli piviusorsiunngitsoq atassutip siulittaasua isumaqarpoq.
- Atassutip piffissami qanittumi namminiilivinnissaq piviusorsiorsorinngiivippaa. Taamaattumillu naalagaaffeqatigiinnermi suleqataalluarnissarput uagut Atassummiit pingaartipparput. Suliat naammassiffeqanngitsutut sinnattuaqissutitut isikkoqartut aningaasalersornissaaniit, maannakkumut ulluinnarni inuuniarnermut pitsaanerusumik atorneqarnissaat ornigineruarput.
"Sinnattuaqineruvoq"
Tunngaviusumik inatsisissaq pillugu ataatsimiititaliaq, 2019-imi akuersissutigineqartoq, unitsinneqassasoq Atassutip naalakkersuisunut kaammattuutigaa.
Ataatsimiititaliap pilersinneqarneraniit siulittaasut allanngorarnikuupput. Doris J. Jensen 2019-imi siulittaasuujunnaarpoq, taassuma ataatsimiititaliap kingulliunneqarniartarnerarpaa.
AAMMA ATUARUK Inatsisit tunngaviusussat pillugit Isumalioqatigiissitaq nutaamik pisortartaartoq
Atassutip siulittaasuata, Aqqalu Jerimiassenip ataatsimiititaliamiit ilaasortaajunnaarluni aalajangernini attattuaannassanerlugu oqaatigisinnaanngikkallarpaa.
- Toqqaannartumik taanna maannakkut akineqarsinnaanngilaq, peqqutigalugu siunissaq ungasinnerusoq isigalugu naluarput pisariaqaleqqissanersoq. Immaqaluunniit maannakkutut isikkoqartillugu pisariaqarsorinngiinnarparput, Aqqalu Jerimiassen oqarpoq.
AAMMA ATUARUK Doris J. Jensen Tunngaviusumik inatsisissaq pillugu isumalioqatigiisitamit tunuartoq
Tunngaviusumik Inatsisissaq pillugu Isumalioqatigiissitaq isumaliutissiissummik nunatta namminiilivinnissaani tunngaviusumik inatsisissamut missingersuummik suliaqartussaalluni pilersinneqarpoq.
Inatsimmut tunngaviusussamut siunnersuutip aappaagu juunip ulluisa 21-anni tunniunneqarnissaa, Inatsisit Tunngaviusussat pillugit Isumalioqatigiissitap siunniunnikuuaa.
