Doris J. Jensen Tunngaviusumik inatsisissaq pillugu isumalioqatigiisitamit tunuartoq
![](/sites/default/files/styles/image_934x467/public/article_images/doris_170913_1.jpg?itok=U2MCCjDq)
Tunngaviusumik Inatsisissaq pillugu Isumalioqatigiissitap siulittaasua Doris J. Jensen isumalioqatigiissitamit ilaasortaajunnaarpoq.
Tamanna sulinikkut atukkat pitsaannginnerannik isumalioqatigiisitallu pingaaruteqarnerata tunulliutinneqarnerannik tunngavilersorpaa.
Taassuma Naalakkersuisuit aamma Tunngaviusumik Inatsisissaq pillugu Isumalioqatigiissitaq mailikkut allalluni aalajangernermik ataasinnormat oqaluttuuppai.
- Naak nunatta oqaluttuarisaanerani pingaarnerpaagaluartoq, suliatut mikisutut isigineqarpoq, Doris J Jensen oqarpoq.
Tunngaviusumik Inatsisissaq pillugu Isumalioqatigiissitami ilaasortaaneq ingammillu siulittasuuneq suliffittut iluittutut isigineqartariaqaraluartoq, taanna isumaqarpoq.
Oqaluttuarporlu, nunatta tunngaviusumik inatsisissaanik nutaamik allanneq tamakkiisumik suliaasariaqaraluartutut nammineq isigigini, Naalakkersuisunut oqaluttuarisarsimagaluarlugu , tusaaneqannginnamili tassa maanna tunuarpoq.
Isumalioqatigiissitami sulinermi atukkanik naammaginninnginnermi saniatigut aamma Ilisimatusarfimmi ilinniartunngorsimanini tunngavilersuutigaa
- Ukiuni 17 -18-ini politikeriuvunga, ilinniarnissara tunulliutissimallugu. Tamanna maanna Ilisimatusarfimmi ilinnialernikkut allanngorpara, Doris Jensen KNR-imut oqarpoq.
Tunngaviusumik Inatsisissaq pillugu Isumalioqatigiissitami ilaasortat aamma Inatsisartuni ilaasortaasut aningaasarsiaqassanersut sapaatit akunneranni kingullermi oqallisaaavoq. akissarsiaqassanngitsut oqallinnerup inerneraa.