Ineqi Kielsenip tunngaviusumik inatsisissaq pillugu isumalioqatigiissitamut siulittaasuunissaa inassutigineqartoq

Ineqi Kielsenip tunngaviusumik inatsisisissaq pillugu isumalioqatigiissitamut siulittaasunngornissaa inassutigineqarpoq.

Siumumi siunnersortip 26-nik ukiullip Ineqi Kielsenip tungaviusumik inatsisissaq pillugu isumalioqatigiissitamut siulittaasuunissaa Siumumit Doris J. Jensenip siulittaasutut tunuarneranit qaammatit marlungajaat qaangiuttut inassutigineqarpoq.

Tunngaviusumik inatsisissaq pillugu isumalioqatigiissitap suliai soqutiginartut, Ineqi Kielsen oqarpoq.

- Inassutiginiarlunga aperineqarnikuuvunga, aamma tamanna soqutigigakku, aammalu suliassaq annertooq, akisussaaffik annertooq, kivitseqataaffigerusullugu akuersaarsimavara, Ineqi Kielsen oqarpoq.

Isumalioqatigiissitamili siulittaasuuneq akisussaafferujussuusoq Ineqi Kielsenip nalunagu oqaatigaa.

- Soorunami eqqarsarpunga, piffissaq qanoq ippa. Taavalu akisussaaffik taama annertutigisoq tigunissaanut imminut nalileqqaarnissaq pisariaqartarmat, eqqarsaatigisimavara. Kisianni piffissap sivisunngitsup iluani innersuunneqarniarnera akuersaarlugu nalunaarutiginikuuara, Ineqi Kielsen oqarpoq.

Ineqi Kielsen 21-nik ukioqarluni Inatsisartunut 2014-imi qinerneqarpoq, Inatsisartunulli 2018-imi qinersinermi naammattunit qinerneqannginnami Inatsisartunut taamani ilaasortanngoqqinngilaq.

Aamma Folketingimut siorna qinigassanngortippoq, Folketingimulli ilaasortanngornissamut naammattunit qinerneqarnani.