Atassut qulaaniit aqunneqassanngilaq
Timooq Mølgaardip partiimut allamut nuunneranut tunngavilersuutaasut ilaatigut tamakkuusut, Atassutip Nuna tamakkerlugu siulittaasuanit, Gerhardt Petersenimit ilumuunnginnerarneqareersullu, Atassutip Nuummi siulittaasuata tullianit, Margrethe Krusemit siulittaasoq taperserneqarpoq.
- Timooq Mølgaardip nalunaarnera, allaanngilaq Nunatsinni Atassutip immikkoortortaqarfii tamaasa sinnerlugit oqaluttoq. Uanga tamanna akerlilerniarpara oqarlunga, Nuummi misigisimanngilagut Atassutip siulersuisuinit tununneqarsimalluta. Aamma oqaatigerusuppara, immikkoortortaqarfiit qullersaqarfimmiit immersorneqarnissamik utaqqiinnartussaanngillat, immikkoortortaqarfiit aamma pisussaapput namminneq qanoq iliuuseqassallutik aammalu qullersaqarfik immersussallugu pisussaallutik, Margrethe Kruse oqarpoq.
Inatsisartunut qinersinerup kingorna 2009-mi pisumi, Atassummut taasisut ikileriarsimagaluartut, taamaattoq Atassutip immikkoortortaqarfii ullumikkut ingerlallualersimasut, Atassutip siulittaasuanit Gerhardt Petersenimit oqaatigineqarpoq.
Taassuma ilanngullugu oqaatigaa, kommunimut qinersinissamut piareersaatit pillugit allagaqaasiaq, siorna oktobarimili immikkoortortaqarfinnut nassiussuunneqareermat.
Tamanna Margrethe Krusemit uppernarsineqarpoq.
- Atassutip qullersaqarfiata allakkiaq immikkoortortaqarfinnut siorna oktobarimi nassiussuuppaa, taannalu imaqarpoq qanoq qinersinissaq tulleq eqqarsaatigalugu sulerusunnersugut. Tamatumalu kinguninngua uagut Nuummi sulilluta aallartippugut, taamaattumik Timuup sullinneqannginnermik tunngavilersuutai eqqortuunngillat, Atassutip Nuummi siulittaasuata tullia, Margrethe Kruse taama uppernarsaavoq.
HS Analysep Sermitsiaq suleqatigalugu Nunatsinni innuttaasunik isumasiuinerani takuneqarsinnaavoq, ullumikkut Inatsisartunut qinersisoqartuuppat Atassut qinersisartut 6,9 procentiinit taaneqassagaluartoq. Tassalu kinguariarsimassagaluarluni, kisiannili Inatsisartuni maanna issiatitatik marluusut tigummiinnassagaat ilimagineqarluni.
Isumasiunerulli taassuma aamma takutippaa, septembarimi kingullermik isumasiuisoqarneranit decembarimut naleqqiullugu Atassut siuarialaarsimasoq, tassa 5,5 procentimiit 6,9 procentimut. Sermitsiaq naapertorlugu siuariarneq pissuteqarpoq, Inatsisartut ukiaanerani ataatsimiinnerisa nalaani Atassut namminersornerulluni isummersortalersimammat, soorlu suliniutinut angisuunut inatsit pillugu.
