Atassut Qaasuitsoq Kujallermi salloqittarneqartutut misigisimavoq
Enok Sandgreen Qaasuitsoq Kujallermi borgmesterinngornani, Ane Hansenip borgmesterinngortussanngornera ualimut Radioaviisimi tusaramiuk, Atassut sinnerlugu Qaasuitsoq Kujalliup kommunalbestyrelsianut ilaasortanngortup Naja Petersenip tupigusuutigaa.
Naja Petersenimi Siumumi ilaasortat arfineq-marluk peqatigalugit suleqatigiinnissamik ippassaq tallimanngornermi isumaqatigiissusiorput, Qaasuitsoq Kujallermilu taamaasillutik amerlanerussuteqalernertik aqqutigalugu Enok Sandgreen borgmesterinngortussatut toqqaraluarlugu.
Suleqatigiinnissamilli isumaqatigiissut Atassummit Siumumiillu ippassaq atsiorneqartoq pisortatigoortumik suli atorunnaarsinneqarsimanngitsoq, Naja Petersenip KNR-imut maanna oqaatigaa:
- Maannakkumut Atassummiit pasiuminaatsipparput Siumukkullu isumaqatigiissutitta pisortatigoortumik suli atorunnaarsinneqanngitsup saniatigut Siumukkut Inuit Ataqatigiinnik suleqatigiinnissammut atsioqateqarsinnaammata, Naja Petersen, KNR-imut taama ilaatigut allaaserisaqarpoq, nangillunilu:
- Taamaattumik Atassummiit misigisimavugut Siumukkuunniit uupakaatinneqarsimasutut salloqittarneqarsimatullu, minnerunngitsumillu oqaatigerusupparput, avissaartuullutik sulinerat matumuuna uppernarsigatsigu, Atassut sinnerlugu Qaasuitsoq Kujalliup kommunalbestyrelsissaanut qinigaasoq Naja Petersen, KNR-imut oqarpoq.